Գագիկ Բեգլարյանը՝ իր կողմից կատարված չարաշահումների, նոր պաշտոնի և Կարապետյանի հայտարարության մասին

Հայաստանի Հանրապետական կուսակցության ԳՄ՝ դեռևս գործող կազմի անդամ, Կապի և տրանսպորտի նախկին նախարար Գագիկ Բեգլարյանը ՀՀԿ–ից նեղացած չէ ու իրեն չգնահատված չի զգում: Ավելին՝ հաջողություն է մաղթում ՏԿՏՏ նոր նախարարին:

«Նեղանալը տղամարդկություն չէ»,-այս մասին այսօր ՀՀԿ համագումարից առաջ լրագրողների հետ զրույցում ասաց Գագիկ Բեգլարյանը, ով ՀՀ Նախագահ Սերժ Սարգսյանին դիմավորող պաշտոնյաների թվում էր:

«Հիմա բոլորս միասին կտեսնենք, թե ինչ փոփոխություններ կլինեն»,- ասաց նա: Ինչ վերաբերում է հարցին, թե ի՞նքն է լինելու Կենտրոնից ՀՀԿ ռեյտինգային պատգամավորը, Գագիկ Բեգլարյանը ոչ հերքեց, ոչ էլ հաստատեց այդ տեղեկությունները, վստահեցնելով, որ ինքը ՀՀԿ համագումարին մասնակցելու է եկել առանց որևէ ակնկալիքի: Նոր պաշտոնի ստանձման մասով, Գագիկ Բեգլարյանը նշեց՝ այդ և նման հարցերը որոշվում է կուսակցությունում, սակայն իր պաշտոնավարման հարցը դեռևս որոշված չէ:

Անդրադառնալով «Հյուսիս–Հարավ» նախագծի հետ կապված չարաշահումներին, նախկին նախարարը ասաց, որ չարաշահումներ, համենայն դեպս իր կողմից, չեն եղել: «Որևէ չարաշահում նախարարության կողմից չի եղել: Հարկային տեսչությունում ինչ-որ աշխատող ֆիրմայում վերցնում են, տեսնում են չարաշահումներ, և մեր կողմից այդ չարաշահումներին գնահատական են տալիս և հետո ներկայացնում են մամուլին, բայց դա չի նշանակում, որ կառավարության աշխատողը չարաշահում է թույլ տվել, կամ նախարարությունում ինչ-որ չարաշահումներ են եղել»,- ընդգծեց նախկին նախարարը: 

Հակադարձմանը, որ գործող նախարարը հայտնաբերել է չարաշահումներ, Գագիկ Բեգլարյանն հորդորեց սխալ հայտարարություններ չանել, քանի որ ինքն անձամբ է լսել նոր նախարարի հայտարարությունը, ով ասել է, թե չարաշահումներ չեն եղել: Վարչապետ Կարեն Կարապետյանի այն հայտարարության մասով, թե մանր գողություններ են եղել, Գագիկ Բեգլարյանն ասաց՝ վարչապետը իրեն նկատի չի ունեցել: «Վարչապետը հաստատ ինձ նկատի չի ունեցել, ինչու՞ պետք է դա ինձ համար վիրավորական լիներ»,- ասաց նա:

Իսկ թե պաշտոնից հեռանալուց հետո ինչով է զբաղվում և ինչ է անում, նախկին նախարարն ասաց՝ հիմա հանգստանում է. «Վայելում եմ հանգիստս՝ թոռնիկիս հետ Երևանում»։ Անդրադառնալով քաղաքապետի պաշտոնում նշանակման մասին լուրերին՝ Գագիկ Բեգլարյանը նշեց, որ այդ տեղեկությունները չեն համապատասխանում իրականությանը: «Մեզ մոտ այդ ամեն ինչը որոշում է կուսակցությունը»,- ԼՈՒՐԵՐ.com-ի հարցին ի պատասխան ասաց նախկին նախարարը:

Արմինե Եփրեմյան