Անհատներն, ովքեր երբեք Հայաստանում չեն եղել, դատավորի դեր են ստանձնել և աջ ու ձախ փնովում են. Սերժ Սարգսյան

Հայաստանն ունի երկրի զարգացմամբ մտահոգ Սփյուռք, ունի աշխարհում հաջողության հասած այնպիսի հայրենակիցներ, ում անձնական եւ ինստիտուցիոնալ հնարավորությունները Հայաստանում ինչ- որ բան առաջ տանելու հարցում շատ ավելին են, քան անգամ պետական մի քանի գերատեսչություններ միասին վերցրած: Այս մասին նոյեմբերի 26-ին Մարզահամերգային համալիրում մեկնարկած ՀՀԿ 16-րդ համագումարի ժամանակ ասաց ՀՀ Նախագահ, ՀՀԿ առաջնորդ Սերժ Սարգսյանը:

Նրա խոսքով՝ Հայաստանը պատրաստ է բաց եւ շիտակ քննարկումների: «Յուրաքանչյուր կարող եւ ցանկություն ունեցող հայի համար մենք փորձելու ենք գտնել գործելու եւ պատասխանատվություն ստանձնելու սեփական հատվածը: Մենք դժվար թե այնքան ժամանակ եւ, անկեղծ ասեմ, ցանկություն գտնենք, որ կարողանանք մեկ առ մեկ արձագանքել այն փոքրաթիվ անհատներին, ովքեր երբեք, կամ բավականաչափ երկար ժամանակահատված Հայաստանում չեն եղել , չգիտեն մեր իրականությունը, որոշ դեպքերում չեն մասնակցում անգամ իրենց համայնքային կյանքին, բայց դատավորի դեր են ստանձնել եւ աջ ու ձախ փնովում են, մեղադրանքներ տարածում»,-ասաց Սարգսյանը՝ հավելելով, որ Կառավարությունը պատրաստ է դառնալ Հայաստան –Սփյուռք գործակցությունը նոր հարթություն տեղափոխելու շարժիչը:

«Այսօր մենք ամրագում ենք ենք, որ նոր թափ ենք հաղորդում աշխարհասփյուռ հայերի ներուժի համադրմանը Հայաստանի տարբեր բնագավառների քաղաքականության մշակման եւ իրականացման գործում: Մենք ոչ թե առանձին ինքնաառաջադրվածների վերահսկողության, այլ սրտացավ եւ խնդիր լուծել կարողացող հայրենակիցների համագործակցության կարիքն ունենք»,-հավելեց երկրի Նախագահը՝ երախտագիտություն հայտնելով Հայաստանում, Արցախում եւ Սփյուռքի գաղթօջախներում բարեգործություն կատարողներին, ինչպես նաեւ նրանց, ովքեր իրենց հնարավորությունների սահմաններում են դա անում՝ ընդհուպ մինչեւ նոյեմբերի 24-ին տեղի ունեցած հեռուսամարաթոնի ընթացքում 23-24 եվրո նվիաբերող մարդկանց:

«Մեր ուշադրության կենտրոնում է մնալու նաեւ աշխարհասփյուռ հայության ինքնակազմակերպման, ազգային ինքնության պահպանության եւ երիտասարդության ներգրավման ուղղություններով տարվող աշխատանքները: Այսօր չենք կարող մեզ թույլ տալ բավարարվել մեր ձեռքբերումներով: Պետք է սահմանենք նոր նշաձողեր: Մեզ պատմական առիթ է տրվել հանդես գալու բազմապատիկ ուժով՝ օգտագործելով Հայաստանի, Արցախի եւ Սփյուռքի հնարավորությունները»,-իր խոսքում ասաց Սերժ Սարգսյանը: