Ես սուպերմեն չեմ, որ 7000 հոգուց ճշտեմ, թե ով ինչ է մտածում. Շարմազանով

Ի տարբերություն շատ կուսակցությունների, մենք մեր նախագահի ելույթները քննարկում ենք, և երեկ ԳՄ նիստի ժամանակ մենք այդ ելույթը ևս քննարկել ենք, որտեղ անդրադարձել ենք կուսակցաշինության խնդիրներին: ՀՀԿ համագումարից առաջ լրագրողների հետ զրույցում ասաց ՀՀԿ խոսնակ, պատգամավոր Էդուարդ Շարմազանովը՝ մանրամասնելով, որ նախագահ Սերժ Սարգսյանի ելույթը ուղերձ կլինի երիտասարդ Հանրապետականներին, որտեղ կքննարկվեն նաև այն խնդիրները, որոնք վերաբերում են ինչպես կուսակցության հարցերին, այնպես էլ արտաքին կապերին:

«Առանձին անդրադարձ կլինի նաև Ղարաբաղյան հարցին: Մենք կներկայացնենք այդ հարցի հետ կապված ՀՀԿ հստակ դիրքորոշումը: Կարևոր անդրադարձ կկատարվի նաև անվտանգության խնդիրներին: Նաև կանխատեսելի հայտարարություններ կարվեն, որպեսզի ավելի հստակ լինի, թե 2017 թվականին ՀՀԿ-ն ինչպիսի թիմով է մասնակցելու խորհրդարանական ընտրություններին»,-ասաց նա:

Պատասխանլով հարցին, թե այս գիշեր ՀՀԿ-ականների թիվը քանիսո՞վ է ավելացել, Շարմազանովը հավելեց, որ ի տարբերություն լրագրողների՝ ինքն այս գիշեր քնել է և տեղյակ չէ, թե քանիսն են ավելացել: «Գիշերային մուտքերի մասին տեղեկություններ չունեմ և չեմ հաշվել: Ինչ վերաբերում է 7000 կուսակցականներին, ապա դա գիշերը չի ավելացել, այլ օրվա ընթացքում: Կարեն Կարապետյանի անդամակցությունից հետո 7000 քաղաքացի անդամակցել է ՀՀԿ-ին»,- ասաց նա:

Դիտարկմանը՝ այսինքն՝ Կարեն Կարապետյանի անդամակցումով բարձրաձավ ՀՀԿ-ի վարկանիշը, Շարմազանովն հավելեց. «Վարկանիշը դա սոցիալ-հոգեբանական կատեգորիա է: ՏԻՄ ընտրությունների արդյունքում պարզ դարձավ, որ ՀՀԿ թեկնածուները ՀՀ բոլոր մարզերում ունեն բարձր վարկանիշ և հաջողության են հասել»:

Ինչ վերաբերում է այն պնդումներին, թե այդ յոթ հազար անդամները գազալցակայանի ու «ԳազՊրոմ Արմենիայի» աշխատակիցներ են, որոնք ստիպողաբար են միացել, Շարմազանովը չհամաձայնեց. «Դուք երեկ փաստորեն չեք հետևել ՀՀԿ ԳՄ նիստին՝ կամ զբաղված եք եղել, կամ շուտ եք քնել: Ես դեռ երեկ եմ ասել, որ մենք քաղաքացիների սորտավորում չենք անում և կապ չունի նրանք «ԳազՊրոմ»-ում են աշխատում, թե որևէ այլ տեղ: Քաղաքացիները դիմում են գրել: Իսկ կուսակցության անդամակցումը ստիպողաբար Կոմկուսի ժամանակ էր, այն էլ՝ քսաներորդ դարում: Հիմա ժողովրդավարական դարաշրջան է և ստիպողաբար հանձնվողը, մի օր էլ դուրս է գալիս կուսակցությունից: Այստեղ ստիպելու հարց չկա, քանի որ մենք արհեստական ուռճացնելու խնդիր չունենք: Հակառակը՝ մենք խնդիր ունենք կուսակցությունը մաքրելու և ավելի արդյունավետ դարձնելու: Ես սուպերմեն չեմ, որ յոթ հազար հոգուց ճշտեմ, թե ով ինչ է մտածում, բայց փաստն այն է, որ մարդիկ դիմում են գրել: Կան տարածքային կառույցներ, որոնք էլ ընդունում են այդ դիմումները: ՀՀԿ-ն միակ այն ուժն է, որը լինելու է փոփոխությունների կրողը այս փոքրիկ Հայաստանում»,- եզրափակեց Շարմազանովը: