«Մարդիկ կան, ովքեր բռնությունից ևս հաճույք են ստանում». Լևոն Զուրաբյանը՝ ՀՀԿ անդամագրվողների մասին

Թե ինչպես և ինչ աստիճանով է փոխվել ՀՀԿ-ն՝ ցույց կտա ժամանակը: Այսպես է կարծում ԱԺ-ի ՀԱԿ խմբակցության ղեկավար Լևոն Զուրաբյանը, ով կարծում է նաև, որ Հանրապետականներն այս փուլում կիրառում են շատ հմուտ PR տոխնոլոգիա, որպեսզի առաջիկա ընտրություններում կարողանան հաղթանակ արձանագրել:

ԱԺ-ում, լրագրողների հետ զրույցում, անդրադառնալով ՀՀԿ համագումարի ժամանակ ՀՀ նախագահ Սերժ Սարգսյանի կողմից հնչեցրած այն հայտարարությանը, որ եթե ՀՀԿ-ն ընտրվի, ապա Կարեն Կարապետյանը կշարունակի պաշտոնավարել վարչապետի պաշտոնում, Լևոն Զուրաբյանը նկատեց. «Շատ պարզ հնարք է կատարվում. Սերժ Սարգսյանը Ալ Ջազիրա հեռուստաալիքին տված հարցազրույցի ժամանակ հայտարարել է, որ իր վարչապետ լինելու հարցը կախված է 2017 թվականի խորհրդարանական ընտրությունների արդյունքից: Այսինքն՝ նա նկատի ունի, որ ոչ թե 2017 թվականից հետո դառնալու է վարչապետ, այլ՝ 2018 թվականի ապրիլի իննից հետո, հետևաբար ՀՀԿ-ն կարող է հանգիստ խոստանալ, որ Կարեն Կարապետյանը կարող է վարչապետի պաշտոնում պաշտոնավարել»:

Զուրաբյանի դիտարկմամբ՝ ստացվում է, որ եթե ամեն ինչ գնում է Սերժ Սարգսյանի սցենարով, ապա Կարեն Կարապետյանի ֆիգուրն օգտագործվելու է 2018 թվականի ընտրություններում արդյունք գրանցելու համար: «Սերժ Սարգսյանն ասում է, որ իր վարչապետ լինելու հարցը կախված է հենց այդ արդյունքից: Եթե ենթադրենք, որ Կարեն Կարապետյանի ջանքերով կլինեն փոփոխություններ, ապա ՀՀԿ-ն կշահի այդ ընտրություններում, հետևաբար Սերժ Սարգսյանն էլ կդառնա նոր վարչապետ: Եվ եթե Սերժ Սարգսյանի հայտարարությունը դիտարկենք հենց այդ տրամաբանության մեջ, ապա ստացվում է, որ Կարեն Կարապետյանի ֆիգուրը կօգտագործվի լավ արդյունքներ գրանցելու համար, որից հետո վարչապետ կդառնա Սերժ Սարգսյանը»,-հավելեց նա:

Լևոն Զուրաբյանը չի հավատում ինչպես ՀՀԿ ղեկավարի անկեղծությանը, այնպես էլ այն հանգամանքին, որ մեկ գիշերվա մեջ յոթ հազար քաղաքացի որոշել է անդամակցել ՀՀԿ-ին: Զուրաբյանի համոզմամբ, դրանք այն մարդիկ են, ովքեր ստիպողաբար միացել են կուսակցությանը, զուտ աշխատանքը չկորցնելու նախապայմանով. «Սա ամենախայտառակ բանն է, որ եղել է երբևէ: Դրանք ջրի, լույսի, գազի այն աշխատողներն են, որոնց ստիպել են ընդգրկվել կուսակցության մեջ: Ես ուղղակի զարմանում եմ. մի՞թե իշխանություններն այնքան են կտրվել իրականությունից, որ արդեն մարդկանց ստիպում են համալրել ՀՀԿ շարքերը: Այնքան անճար են, որ չեն հասկանում, թե նման քայլը՝ մանավանդ ընտրություններից առաջ, և հենց այն մարդկանց մոտ, որոնց պարտադրել են միանալ իրենց, առաջացնելու է զզվանքի, ատելության, օտարման զգացողություն»:

Դիտարկմանը՝ գուցե հաճույքո՞վ են ընդգրվել այդ մարդիկ ՀՀԿ-ում, Լ. Զուրաբյանը հավելեց. «Մարդիկ կան, ովքեր բռնությունից ևս հաճույք են ստանում»: