Հայ Կարմիր Խաչի հիմնադրման պատմությունից. 1920 թվականի լուսանկար

Ռուբեն Շուխյանը ֆեյսբուքյան իր էջում գրել է.

«Ներկայացվող պատկերում 1920 թվականի նոյեմբերին Բոստոնում կայացած Հայ Կարմիր Խաչ կազմակերպության պատգամավորական ժողովի պատվիրակներն են՝ Հայաստանի և ԱՄՆ-ի դրոշների ներքո (լուսանկարը՝ Asbarez կայքից):

Հայ Կարմիր խաչը իր գործունեությունը սկսեց 20-րդ դարի առաջին տասնամյակում ԱՄՆ-ում' փաստացի դառնալով հայ իրականության մեջ գործող կանանց առաջին միջազգային կազմակերպությունը: Ներշնչվելով Կամիր Խաչի միջազգային կազմակերպության մարդասիրական գործունեությամբ, հայ կանանց այդ խմբերը 1910 թ. որդեգրեցին Կարմիր Խաչի պաշտոնական անունը' առաջնորդվելով ՀՅԴ Ամերիկայի Կենտրոնական կոմիտեի կողմից: Ամերիկայի Հայ Կարմիր Խաչի կազմակերպությունն իր 1-ին պատգամավորական ժողովը գումարեց 1915 թ. մայիսին Բոստոնում, որտեղ որոշվեց Կովկասյան ճակատ ուղարկել կամավոր հիվանդապահուհիներ: Ժողովը հեռագիր ուղարկեց նաև ԱՄՆ նախագահ Վուդրո Վիլսոնին' խնդրելով միջամտել դադարեցնելու Օսմանյան Թուրքիայում սկսված հայկական ջարդերը:

1919-ի հուլիսին գումարվեց 2-րդ պատգամավորական ժողովը, որտեղ հավաքված պատվիրակները որոշեցին փոխել ՀՅԴ Կարմիր Խաչ անունը, այն պաշտոնապես վերանվանել Հայաստանի Կարմիր Խաչ և ստեղծել մասնավոր ֆոնդ' Հայաստանի Հանրապետությունում հիվանդանոց հիմնելու համար: 1920 թ. նոյեմբերին Բոստոնում տեղի ունեցավ Հայաստանի Կարմիր Խաչի 3-րդ պատգամավորական ժողովը, իսկ 1921 թ. հուլիսին, կրկին Բոստոնում, գումարվեց միացյալ պատգամավորական ժողով, որտեղ որոշվեց ամերիկահայ բոլոր կանանց միությունները համախմբել մեկ ընդհանուր գաղափարի շուրջ' Հայ Կարմիր խաչ անվանումով: Կազմակերպությունը պետք է ենթարկվեր Հայաստանի Հանրապետության կողմից ճանաչված և վավերացված Հայկական Կարմիր Խաչին, որի օրենքները նախապես համաձայնեցվել էին Միջազգային Կարմիր Խաչի օրենքներին (տեղեկությունները՝ Ցեղասպանության թանգարան-ինստիտուտի կայքից)»: