Ընդդիմությունը հաղթելու շանսեր չունի, որովհետև շերտավորված է. Շարմազանով

ՀՀԿ պատգամավոր, ԱԺ փոխխոսնակ Էդուարդ Շարմազանովի համոզմամբ՝ գալիք ընտրություններում ընդդիմությունը հաղթելու շանսեր չունի, քանի որ շերտավորված է, այն էլ՝ մի քանի շերտով:

Շարմազանովը չի կիսում այն տեսակետը, որ Հայաստանում տարեցտարի ընտրական պրոցեսների նկատմամբ անվստահությունը մեծանում է, և, որ ընտրությունները Հայաստանում ազատ ու արդար չեն լինում:

«Ընտրությունների լավագույն արդյունքների գնահատականները տալիս են միջազգային դիտորդները, ովքեր բոլոր նախընտրական ու ընտրական գործընթացների վերաբերյալ հնչեցնում են իրենց տեսակետը: Բոլոր գնահատականները նայեք ու կտեսնեք, որ աստիճանաբար յուրաքանչյուր ընտրություն ավելի դրական գնահատականի է արժանանում, քան նախորդը: Մենք չենք հերքում, որ մենք դեռ աշխատելու տեղ ունենք, բայց դա ևս ժամանակի հարց է: Եթե ԱՄՆ-ի պես ժողովրդավար երկրում են ընտրական պրոցեսները վիճելի, ինչպես կարող է երիտասարդ Հայաստանում դա խնդիր չլինել, պարզապես պետք է դա դիտարկենք համեմատության մեջ»,- ասաց նա:

Ըստ Շարմազանովի՝ նորմալ է նաև, երբ ընտրական պրոցեսների նկատմամբ հասարակության պահանջները գնալով մեծանում են, բայց նրա խոսքով՝ դա պետք է նպատակ հետապնդի ոչ թե ստվեր գցելու այդ գործընթացների նկատմամբ, այլ «հասարակության և լրագրողների պահանջները, ինչպես նաև ընդդիմության քննադատությունը, պետք է լինեն կառուցողական, ինչը պետք է օժանդակի իշխանություններին»: «Մենք ևս մեր հասցեին հնչեցրած գնահատականներն ընդունում ենք որպես օժանդակելու միջոց: Ես տաս տարուց ավելի արդեն քաղաքականության մեջ եմ և առաջին անգամ եմ տեսնում, որ ընտրական գործընթացների շուրջ իշխանությունն ու ընդդիմությունը եկել են պատմական համաձայնության»,- հավելեց նա:

Պատասխանելով հարցին՝ ընդդիմությունն այս անգամ ունի՞ շանսեր՝ հաղթելու, Շարմազանովն ասաց. «Անկեղծ՝ ոչ, որովհետև՝ տեսեք, թե ովքեր են ընդդիմադիր ուժերը. ԲՀԿ-ն, ՕԵԿ-ը, ՀԱԿ-ը, «Լուսավոր Հայաստան»-ը, ՔՊ-ը, «Ազատ դեմոկրատներ»-ը, ՀՀՇ-ն, «Ժառանգություն»-ը… Գոնե այն ուժերը, որոնք որ խորհրդարանում են, եթե կարողանան համախմբվեն, մենք ուրախ կլինենք, բայց դա անհնար է, որովհետև հաջորդ խորհրդարանական ընտրություններին առանցքային հարցերից մեկը պետք է լինի Հայաստանի արտաքին քաղաքականությունը, և այդ քաղաքական կուսակցությունները պետք է հստակեցնեն իրենց ուղղվածությունը: Չի լինում, երբ մեկը մինչև ժամը տասներկուսը ՀԱՊԿ-ի կողմնակից է, տասներկուսից հետո՝ ԵՄ, երկուսից վեցն էլ՝ չկողմնորոշված: Քաղաքացիները պետք է իմանան, թե ում են ձայն տալիս. մի ուժի, որն ուզում է գնալ ՆԱՏՕ՞, մյուսի՞ն, որը կողմնակից է ԵՄ-ին, թե՞ մեկ ուրիշին, որը կարծում է, որ Հայաստանը պետք ա գնա ՀԱՊԿ, խորացնի իր հարաբերությունները, և ԵՄ հետ իր հարաբերություններն է՛լ ավելի զարգացնի»,- ասաց նա:

Շարմազանովը չի պատկերացնում նաև, որ խորհրդարանական ընտրություններին ՀԱԿ-ը «Լուսավոր Հայաստան»-ի կամ որևէ այլ ընդդիմադիր ուժի հետ ներկայանա մեկ միասնական ցուցակով, որի առաջին երկուսը կողմ են քվեարկել ԵՏՄ-ին, իսկ նույն «Լուսավոր Հայաստան»-ի, «Ժառանգության» կամ ՀՀՇ ներկայացուցիչները՝ ԵՄ-ին: «Արհեստական միավորումները անգրագիտության ժանրից են: Բոլոր միավորումները, նախևառաջ, պետք է լինեն քաղաքական օրակարգի շուրջ: Հետևաբար, այսօրվա ընդդիմադիր ուժերը չեն կարող միավորվել: Եթե միավորվեն էլ, դա կլինի նախընտրական կոմբինացիա, որը մենք տեսել ենք նույն «Ժառանգության» դեպքում, նույն «Արդարություն դաշինք»-ի հետ կապված, որոնք ընտրվել են ու վեց ամիս հետո փլուզվել: Ընդդիմությունը բազմաշերտ է: Դեռևս իրենք էլ չգիտեն, թե ինչ են անելու, ինչ ֆորմատով են գնալու, եթե իշխանության դեպքում դա պարզ է, ապա ընդդիմության դեպքում՝ դա անորոշ է»,- եզրափակեց նա: