Մարզպետը կարող է ազատ գնալ, և աշխատանքից հետո քարոզչություն իրականացնել. Շարմազանով

Բոլոր քաղաքական ուժերը մեզ մրցակից են:

ԱԺ-ում լրագրողների հետ զրույցում այս մասին հայտարարեց ՀՀԿ պատգամավոր, ԱԺ փոխխոսնակ Էդուարդ Շարմազանովը:

«Քաղաքականության մեջ գոռոզությունը տուն կքանդի: Պետք է հաշվի առնենք մեր բոլոր մրցակիցներին ու հարգանքով վերաբերվենք նրանց: Սեփական ուժերի գերագնահատումը մեզ կտանի դեպի ֆիասկո»,- ասաց նա՝ շարունակելով, որ ՀՀԿ-ն հարգանքով է վերաբերվում բոլոր քաղաքական ուժերին և չի կարծում, թե ժողովրդի ուշքը գնում է ՀՀԿ-ի համար: «Մենք գիտենք, որ կան բազում խնդիրներ և չնայած դրան՝ ակնկալում ենք ազատ, արդար, թափանցիկ և ժողովրդավարական մրցապայքար, բայց այսօր ես չեմ տեսնում մի ընդդիմադիր ուժի, որը կարող է ընտրությունների ժամանակ հաջողության հասնել: Կյանքում ամեն ինչ էլ հնարավոր է, բայց այս պահին չեմ տեսնում»,- ասաց պատգամավորը:

Շարմազանովը հավելեց նաև, որ ՀՀԿ-ն գերադասում է հինգ-տաս տոկոս պակաս ձայն հավաքել, քան նույնքան ավել ձայն ունենալ, բայց ընտրողների մոտ կասկած առաջանա, թե ընտրությունները կեղծվել են: «Մեզ պետք են անբիծ, մաքուր ժողովրդավար, մրցակցային ընտրություններ: Մենք շատ զիջումների գնացել ենք հենց այդ պատճառով: Չեն կարող չլինել, իսկ եթե չլինեն, մենք կստիպենք, որպեսզի այդպիսին լինեն: Եվ այդ պայքարը, խաղը՝ երկկողմանի է: Հիմնական, պետականամետ և լուրջ ընդդիմադիրների մոտ ևս այդ ցանկությունը կա: Իրենք էլ են ցանկանում, որպեսզի մեր երկրում լինեն նորմալ, ժողովրդավար ընտրություններ: Բայց դա չի նշանակում, որ այդ ընտրությունների արդյունքում իշխանությունը պետք է պարտվի, իսկ ընդդիմությունը՝ հաղթի»,- ասաց նա:

Ինչ վերաբերում է հարցին, թե ընտրական պրոցեսներին մարզպետները ևս ակտիվություն կունենան, Շարմազանովը հավելեց, որ մարզպետները ևս ՀՀԿ-ի ներկայացուցիչներ են: «Խոսքն այն մասին է, որ նրանք չպետք է խախտեն օրենքը: Այսինքն՝ նրանք աշխատանքից հետո ազատ են քարոզչություն անելու համար: Եթե մենք ամեն ինչ կարողանանք կազմակերպել նոր ԸՕ տառին ու ոգուն համապատասխան, ապա խնդիր չի լինի: ԱՄՆ նախկին նախագահն էլ օրը ցերեկով Քլինթոնի համար քարոզչություն էր անում: Այսինքն՝ մարզպետը կարող է ազատ գնալ և աշխատանքից հետո քարոզչություն իրականացնել»,-ասաց նա՝ հավելելով նաև, որ ընդդիմությունը լավ կանի՝օգտվի նոր ԸՕ-ով իրեն տրված բոլոր հնարավորություններից, որպեսզի հետագայում հարցեր չառաջանան: