Ողջամիտ չէ, երբ ՀԱՊԿ անդամ երկրների ղեկավարները չեն հարգում իրենց ստորագրությունները. Շարմազանով

Ղարաբաղյան հարցը պետք է լուծվի ՄԽ համանախագահության ձևաչափի ֆորմատով և հայտնի երեք սկզբունքների հիման վրա: ԼՈւՐԵՐ.com-ի թղթակցի հետ զրույցում անդրադառնալով Բելառուսի և Ադրբեջանի նախագահների համատեղ հայտարարությանն, ասաց ԱԺ փոխխոսնակ Էդուարդ Շարմազանովը:

Հիշեցնենք, որ պաշտոնական այցով Ադրբեջանում գտնվող Բելառուսի նախագահ Ալեքսանդր Լուկաշենկոն և Ադրբեջանի նախագահ Իլհամ Ալիևը հանդես են եկել հայտարարությամբ, որտեղ նշել են, թե Լեռնային Ղարաբաղի հարցը պետք է լուծվի տարածքային ամբողջականության բանաձևի հիման վրա, որտեղ խոսք չի գնում ազգերի ինքնորոշման իրավունքի մասին: Ավելին՝ Հայաստանի դաշնակից Բելառուսի նախագահը պաշտոնապես հայտարարել է, որ Ադրբեջանն այդ հարցում հույսը կարող է դնել Բելառուսի վրա:
«Լեռնային Ղարաբաղի խնդրի կարգավորումը բացառապես պետք է լուծվի խաղաղ բանակցային գործընթացի միջոցով, որը ենթադրում է նաև ազգերի ինքնորոշման իրավունք: Ես այդ մասին ասել եմ նաև չորս օր առաջ՝ Սանկտ-Պետերբուրգում կայացած հանդիպմանը, որին ներկա է եղել նաև Բելառուսի Ազգային ժողովի նախագահը: Մեր գործընկերներին հստակ ձևակերպմամբ հասկացրել եմ, որ պետք էր վաղուց հասկանալ, որ Լեռնային Ղարաբաղի ժողովրդի անկախությունն այլընտրանք չունի: Այս հայտարարությունը մեր Բելառուսի գործընկերը շատ լավ լսել ու շատ լավ հասկացել է»,- ասաց նա:

Շարմազանովը ևս մեկ անգամ ընդգծեց, որ Ղարաբաղի ժողովուրդն ինքը պետք է որոշի իր հետագա ճակատագիրը, իհարկե՝ երեք հայտնի սկզբունքների հիման վրա:

Հարցին՝ ինչ է նկատի ունեցել Լուկաշենկոն, երբ հայտարարել է, որ Ադրբեջանը կարող է հույսը դնել Բելառուսի վրա, Շարմազանովը պատասխանեց. «Ես չգիտեմ, թե ինչ է նկատի ունեցել և ում վրա կարող է հույսը դնել Ադրբեջանը, բայց մենք մեր հույսը դրել ենք մեզ վրա. մեր ուժերի ու սպառազինության, ինչպես նաև մեր դաշնակիցների հետ համագործակցության վրա»:

Դիտարկմանը, որ ՀԱՊԿ-ում մեր դաշնակիցն է նաև Բելառուսը, մենք չպե՞տք է կոշտ դիրքորոշում ցուցաբերենք, ԱԺ փոխնախագահը շեշտեց, որ Հայաստանը մեկ անգամ արդեն այդ կապակցությամբ կոշտ դիրքորոշում արտահայտել է, և հիշեցրեց, որ ապրիլյան պատերազմից հետո Բելառուսի դեսպանը հրավիրվել է արտգործնախարարություն, որտեղ հստակ ասվել է, որ անթույլատրելի է, երբ ՀԱՊԿ անդամ երկրների ներկայացուցիչները նման դիրքորոշում են ցուցաբերում: «Բացի դա՝ 2016 թվականի հոկտեմբերի 14-ին կայացած ՀԱՊԿ անդամ երկրների նախագահների հանդիպման ժամանակ Երևանում ստորագրվել է հռաչակագիր՝ Լեռնային Ղարաբաղի վերաբերյալ, որի տակ՝ բացի Ղազախստանի նախագահ Նազարբաևից, ստորագրել են բոլորը, այդ թվում՝ նաև Բելառուսի նախագահ Ալեքսանդր Լուկաշենկոն: Այդ հռչակագրում հստակ գրված է, թե Լեռնային Ղարաբաղի հարցն ինչպես պետք է լուծվի: Մենք այդ հռչակագիրն ենք հիմք ընդունում որպես Բելառուսի և ՀԱՊԿ անդամ պետությունների պաշտոնական դիրքորոշում: Այդ դեկլարացիայի բոլոր խախտումները նշանակում է, որ մարդիկ չեն իրականացնում ՀԱՊԿ պաշտոնական դիրքորոշումը: Ողջամիտ չէ, որ ՀԱՊԿ անդամ պետությունների ղեկավարները կամ ներկայացուցիչները չեն հարգում իրենց ստորագրությունները»,- եզրափակեց նա: