Ինքը՝ Գալուստ Սահակյանը, մեր ազգային ըմբռնումների մեջ չկա. Լևոն Զուրաբյան

ՀԱԿ խմբակցության ղեկավար Լևոն Զուրաբյանն իրականում չի հասկանում, թե ինչ է նկատի ունեցել ԱԺ նախագահ Գալուստ Սահակյանը, երբ երեկ, արտահերթ նիստի ժամանակ, դիտողություն անելով, ասել է. «Տեր-Պետրոսյանը մեր ազգային ամբողջ ըմբռնումների ընթացքում եղել է մերը»:

«Նախ՝ ապշած եմ, որովհետև պարզվում է, որ Գալուստ Սահակյանի խոսքը հնարավոր չէ հասկանալ ու ըմբռնել, որովհետև նա մի ֆրազ ասաց, որը ես չեմ կարողանում ընկալել: Ես սովոր եմ հակառակորդին հարգել և փորձում եմ ամեն կերպ ռասշիֆրովկա անել ու հասկանալ այդ ֆրազը, բայց չի ստացվում: Համենայն դեպս, ես հասկանում եմ, որ ինքը՝ Գալուստ Սահակյանը, մեր ազգային ըմբռնումների մեջ չկա, որովհետև նրա ասածներն ըմբռնել՝ ընդհանրապես շատ դժվար է»,- ասաց նա՝ հավելելով, որ դժվարանում է ասել, թե ԱԺ նախագահի որ ասածը պետք է լուրջ ընկալել, որը՝ ոչ:

Ինչ վերաբերում է Ղարաբաղյան հակամարտության խնդրին, որի վերաբերյալ ևս իր հայտարարությունում Գալուստ Սահակյանն ասել էր, թե Լևոն Տեր-Պետրոսյանին այդ ժամանակ չսատարեցին, քանի որ նա ուզում էր հողերը հանձնել, Լ. Զուրաբյանն այս կապակցությամբ հայտարարեց, որ Լևոն Տեր-Պետրոսյանի գլխավորած տարիները պատմության մեջ առաջինն էին, որ ոչ թե հողեր էին հանձնում, այլ գրավում էին.

«Մենք տեսել ենք իրենց վարած բանակցությունները և տեսել ենք, թե որքան փխրուն են այսօր դրանք դարձել, ու Հայաստանն ավելի վատ դիրքերում է այսօր հայտնվել: Ես չգիտեմ, թե հիմա մենք ինչի համար ենք պայքար տանում, բայց, համենայն դեպս, Հայաստանի ու Արցախի դիրքորոշումները շատ ավելի թույլ են, քան Լևոն Տեր-Պետրոսյանի օրոք: Ամենակարևորը սա է, մինչդեռ՝ 90-ականներին Ադրբեջանն ավելի թույլ դիրքեր էր զբաղեցնում, քան այսօր: Դեռ այդ ժամանակ՝ Ադրբեջանը պատրաստ էր և իր համաձայնությունն արդեն տվել էր խաղաղ կարգավորման գործընթացին, և Հայաստանը բանակցում էր ուժեղի դիրքերից, իսկ այսօր թելադրողը Ադրբեջանն է»,- ասաց նա:

Դիտարկմանը՝ փաստորեն դուք հողե՞ր չեք ցանկացել հանձնել, Լ. Զուրաբյանը հավելեց. «Այդ գնահատականները, որոնք հնչում են, աբսուրդի ժանրից են, որովհետև հայոց պատմության վերջին հազարամյակում հայերը ու Հայաստանը ոչ թե հող են հանձնել, այլ հող են ձեռք բերել: Զարմանալին էլ հենց այն է, որ հմուտ քաղաքական գործիչները խաղաղ բանակցությունների միջոցով հողեր են վերցնում, իսկ Գալուստ Սահակյանի տիպի ազգային ըմբռնումների մեջ գտնվողները՝ հակառակը՝ տարածք են հանձնել: Նրանք ռազմատենչ հայտարարություններ են անում անհաշտ դիրքերից, բայց փոխարենը գործընթացը տանում են փակուղի, պարտություն և հողերի հանձնում»,- եզրափակեց նա: