«Ամանորը Նազարի մոտ». Նարեկ Դուրյանը երաժշտական կատակերգություն է հեղինակել

Սիրված դերասան, ռեժիսոր Նարեկ Դուրյանի ղեկավարած և հիմնադրած «Բոհեմ» թատրոնը Նոր տարվան ընդառաջ հետաքրքիր բեմականացում կներկայացնի: Այս մասին ԼՈՒՐԵՐ.com-ի թղթակցի հետ զրույցում նշեց Թատրոնի պրոդյուսեր Քրիստինա Հովհաննիսյանը: Նշենք, որ թատրոնում վերջին ամիսներին ցուցադրվում են Նարեկ Դուրյանի մի քանի ներկայացումներ, որոնք արդեն բավականին սիրված են հանդիսատեսի կողմից, իսկ դեկտեմբերի 25-ից թատրոնի խաղացանկը կհամալրվի նոր՝ մանկական ներկայացումով:

«Մոտ երկու ամիս է, ինչ մեր գործունեությունն այստեղ ենք ծավալում: Հետաքրքրությունը բավական մեծ է և հանդիսատեսը սովորել է թատրոնի տեղը, հարմարվել»,- մեզ հետ զրույցում նշեց նա:

Նրա խոսքով՝ Նարեկ Դուրյանը չի անտեսել մանուկներին, և ինչպես խոստացել էր՝ բեմադրություն է պատրաստել նրանց համար: «Ներկայացումը կոչվում է «Ամանորը Նազարի մոտ», որի հիմքում հայկական հեքիաթներն են: Մեկ ժամ տևողությամբ երաժշտական կատակերգություն է, որի երգերի բառերի և երաժշտության հեղինակը Նարեկ Դուրյանն է: Գիտեմ, որ երեխաները շատ են սիրում նրան, նա կարողանում է գրավել փոքրիկներին»,- ասաց նա՝ հավելելով, որ ներկայացման մեջ ներառված են ինտերակտիվ հատվածներ, իսկ հերոսները հայկական հեքիաթների կերպարներն են. «Կլինեն նաև Ձմեռ պապն ու Ձյունանուշը»:

«Ներկայացման մեջ խաղում են հիմնականում երիտասարդ դերասաններ: Այդպիսով, մենք նաև երիտասարդներին ենք հնարավորություն ընձեռել հանդես գալ թատրոնում, ինչը շատ լավ սկիզբ է նրանց համար: Շատ լավ երիտասարդներ են, ովքեր ոչ միայն դերասանությամբ են զբաղվում, այլև գրում են, ջնջում, աշխատում, հսկում, վերանորոգում… Ունիվերսալ վարպետ-դերասաններ ենք պատրաստել»:

Ինչ վերաբերում է հարցին, թե 2017-ին ինչ նոր անակնկալներ կլինեն հանդիսատեսի համար, պրոդյուսերը նշեց, որ  նոր ներկայացումներ անպայման կլինեն. «Մի քանի պրեմիերաներ կունենանք: Շարունակելու ենք նաև խաղացանկային ներկայացումներ ցուցադրել: Կունենանք նաև հյուրախաղեր՝ տարբեր երկրներում»:

Ներկայացումները կլինեն դեկտեմբերի 25-30-ը, այնուհետև տոներից հետո՝ հունվարի 4-ից:

Արմինե Եփրեմյան