Արդյոք անհրաժեշտությո՞ւն էր համահայկական սիմֆոնիկ նվագախբի ստեղծումը

Օրեր առաջ՝ մշակույթի նախարար Արմեն Ամիրյանը Սերժ Սարգսյանի հետ հանդիպման ժամանակ առաջարկել է ստեղծել համահայկական սիմֆոնիկ նվագախումբ, որի կազմում պետք է ընդգրկվեն թե՛ Հայաստանում, և թե՛ Հայաստանից դուրս գտնվող ու գործող հայ երաժիշտները: Առաջին համերգը նախատեսվում է իրականացնել 2017 թվականի ապրիլի 24-ին, Երևանում: 

ԼՈւՐԵՐ.com-ի թղթակցի հետ զրույցում՝ Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, խոսելով նոր նվագախումբ ձևավորելու կարևորության մասին, ասաց, որ Հայաստանում գործող յուրաքանչյուր նվագախումբ, կոլեկտիվ՝ ունի իր հստակ նպատակներն ու խնդիրները: Համահայկական նվագախումբն էլ ունի իր նպատակները: «Մեր ռեսուրսը ոչ միայն Հայաստանում է, այլև սփյուռքում: Կա կոնկրետ՝ համահայկական, համազգային, նույնիսկ՝ համամարդկային խնդիր՝ համախմբել հայ կատարողական արվեստի ներկայացուցիչներին մեծ գաղափարի շուրջ, և այս նվագախումբը պետք է հենց այդ խնդիրը լուծի»,- ասաց Սմբատյանը:

Հարցին՝ արժե՞ արդյոք այդքան գումարներ ներդնել նվագախումբ ստեղծելու համար, Սերգեյ Սմբատյանը պատասխանեց.

«Արվեստն ամբողջ պատմության ընթացքում մշտապես կարիք ունի ֆինանսական ներդրումների: Կան ծախսեր, որոնք ռազմավարական նշանակություն ունեն երկրի համար: Այս նվագախմբի տեսլականն այնքան անհրաժեշտ է այսօր մեզ բոլորիս և աշխարհին, որ գումարն այս պարագայում առաջնային չէ»:

Մեզ հետ զրույցում ՀՀ ժողովրդական արտիստ, ՀՀ արվեստի վաստակավոր գործիչ Մարտին Վարդազարյանը նախաձեռնությունը համարեց «հիանալի»:

«Դա կլինի համազգային նվագախումբ. փայլուն երաժիշտներ ունենք տարբեր երկրներում, որոնք գալիս են հյուրախաղերով կամ չեն գալիս, և մենք նրանց մասին՝ ուղղակի գիտենք: Սա շատ մեծ դեր ու նշանակություն կունենա հայ երաժշտության տարածման համար»,- ասաց ՀՀ արվեստի վաստակավոր գործիչը:

Մարտին Վարդազարյանի կարծիքով՝ մեծ առավելություն է այն, որ կկատարվի հայ կոմպոզիտորների ստեղծագործությունները և հայ երաժշտությունը կտարածվի աշխարհով մեկ:

«Մենք ունենք հիանալի սիմֆոնիկ նվագախումբ, ֆիլհարմոնիկ նվագախումբ, օպերային նվագախումբ, բայց դրանք մեզ մոտ են, մենք ենք մեզ լսում ու գնահատում, իսկ այսպիսի նվագախումբը ողջ աշխարհով մեկ կտարածվի և հետաքրքրություն կառաջանա մեր երաժշտության նկատմամբ»:

Հարցին՝ որքանո՞վ է նպատակահարմար գումարներ ներդնել նվագախումբ ստեղծելու համար, Մարտին Վարդազարյանը նշեց, որ եթե նվագախումբը համահայկական է լինելու, դա նշանակում է, որ այն միայն մեր նյութական բարիքների հիման վրա չի ստեղծվելու:

Հարցի առնչությամբ տեսակետ ստացանք նաև դիրիժոր Վարդան Հակոբյանից, ով այս պահին երաժշտական գործունեություն է ծավալում ԱՄՆ-ում:

«Անշուշտ համահայկական սիմֆոնիկ նվագախումբ ունենալը գեղեցիկ գաղափար է, բայց փորձը ցույց է տալիս, որ ազգի նպատակների և երազանքների հետ ոչ մի կապ չունեցող այս վարչախումբը արժեզրկել է բոլոր ազգային ծրագրերը, և, ցավոք, նույն բանը լինելու է այս ծրագրի հետ նույնպես»։

Վարդան Հակոբյանի խոսքով՝ մոտ 10 տարի առաջ Վենեսուելայում պետականորեն ներդրվեց EL programme նախագիծը, որով կառուցվեցին հսկայական քանակությամբ տուն-ինտերնատներ, որտեղ հավաքում էին հիմնականում անապահով ընտանիքներից երեխաների և նրանց սովորեցնում էին թիմային աշխատանք ու երաժշտություն։ Այնտեղ հրավիրեցվին աշխարհի լավագույն ուսուցիչները, որոնք սովորեցնում էին պարտադիր բոլորին նվագել տարբեր գործիքների վրա։ Կարճ ժամանակում այդ ծրագիրը տվեց ֆենոմենալ արդյունքներ։

«Այսօր աշխարհի լավագույն դիրիժորներից մեկն է Գուստավո Դուդամելը, որն այդ ծրագրի արդյունքում է ի հայտ եկել և այսօր ղեկավարում է Լոս Անջելեսի Ֆիլհարմոնիկ նվագախումբը, մշտական հրավիրված դիրիժոր է Բեռլինի, Վիեննայի և աշխարհի ամենաբարձր վարկանիշ ունեցող նվագախմբերում։ Այդ ծրագրի արդյունքում է, որ Վենեսուելայի երիտասարդական և պրոֆեսիոնալ նվագախմբերն աշխարհի լավագույն նվագախմբերի ցանկում են և մասնակցում են ամենահեղինակավոր փառատոններին։ Ասելիքս այսքանով կավարտեմ՝ նորից ընդգծելով, որ ցանկացած լավագույն և պարզ ծրագրի հաջողությունը կախված է իրականացնողներից։ Իսկ լավատեսություն համար ոչ մի հիմք չունեմ»,- ասաց Հակոբյանը։ 

Սոնա Հարությունյան