Կեղծիքների դռները փակվել են. Արմեն Ռուստամյան

«Ես շատ ուրախ եմ, որ Սերժ Թանկյանն էլ է ուզում մասնակցել գալիք ընտրություններին: Վստահ եմ, որ նա որպես դիտորդ կտեսնի ու կարձանագրի, որ հաջորդ ընտրություններն աննախադեպ են լինելու»,- խորհրդարանում լրագրողների հետ զրույցում պատասխանելով ԼՈւՐԵՐ.com-ի թղթակցի հարցին, ասաց ԱԺ պատգամավոր Արմեն Ռուստամյանը, հավելելով, որ հաջորդ հանրապետական ընտրություններն իսկապես տարբերվելու են նախորդներից:

«Այն, ինչ որ մենք փոխել ենք Հայաստանի ընտրական համակարգում, նախադեպը չունի: Այն բոլոր խնդիրները, որոնք կապված էին իշխանությունների վերարտադրության հետ, մենք արմատախիլ ենք արել: Այսօր մենք իսկապես ունենք մի ընտրական համակարգ, որով կարող ենք արձանագրել, որ ընտրություններն անցնելու են այնպես, ինչպես որ մյուս ժողովրդավարական երկրներում: Իշխանությունները կարող են իրենց դիրքերը պահպանել՝ բացառապես վերնըտրվելով, ոչ թե վերարտադրվելով: Մենք կարող ենք ասել, որ ընդդիմությունը կկարողանա հաջողել հաջորդ ընտրություններում և իշխանափոխություն իրականացնել»- ասաց նա:

Ա. Ռուստամյանի խոսքով՝ փակվել են բոլոր այն կեղծիքների դռները, որոնք մինչև հիմա թույլ են տրվել: «Այն խախտումները, որոնք հիմնականում վերաբերվում էին բազմակի քվեարկություններին ու մյուս ընտրախախտումներին, դրանց դեմն առնող մեխանիզմներ ենք մշակել, և այս ընտրություններն իսկապես աննախադեպ են լինելու»,- ասաց Ռուստամյանը:

Արմինե Եփրեմյան