Երգչուհի Զառան ընդգրկվել է ՅՈՒՆԵՍԿՕ-ի՝ «Արտիստները հանուն խաղաղության» պատվավոր խմբում

ՄԱԿ-ի կրթության, գիտության ու մշակույթի հարցերով զբաղվող կազմակերպությունը ռուսաստանցի հայտնի երգչուհի Զառային արժանացրել է «ՅՈՒՆԵՍԿՕ-ի արտիստ հանուն խաղաղության» իր պատվավոր կոչմանը: Այդ բարձր միջազգային պարգեւով դափնեկրի պարգեւատրումը տեղի է ունեցել դեկտեմբերի 5-ի երեկոյան, կազմակերպության փարիզյան կենտրոնակայանում:

Հանդիսավոր արարողությանը, որը հավաքել էր բազմաթիվ երկրների դիվանագետների ու մշակույթի գործիչների, նշվել է, որ Զառան (Զարիֆա Մգոյան) մասնակցում է բազմաթիվ բարեգործական նախագծերի, օգնում է կույր եւ թույլ տեսնող երեխաներին: Խաղաղության նոր արտիստին իրենց սրտագին շնորհավորանքներն են փոխանցել Միրեյ Մատիեն, ֆրանսիական մշակույթի հայտնի այլ գործիչներ, որոնք մասնակցել են արարողությանը: «Արտիստ հանուն խաղաղության» պատվավոր կոչումը, ՏԱՍՍ-ին պատմել են ՅՈՒՆԵՍԿՕ-ի աշխատակիցները, հիմնվել է երկու տասնամյակ առաջ՝ 1995 թվականին: Դափնեկիրներ ի այդ խումբը միավորում է «ամբողջ աշխարհում ճանաչված արվեստի գործիչների, որոնք իրենց ազդեցությունը, ժողովրդականությունը եւ հեղինակությունն ի սպաս են դրել ՅՈՒՆԵՍԿՕ-ի ծրագրերի իրականացմանը»:

Պարգեւի գոյության առաջին տարիներին դրա դափնեկիրներն են դարձել նշանավոր կանադացի երգչուհի Սելին Դիոնը եւ Մեծ Բրիտանիայի առավել մեծ ժողովրդականություն վայելող երգչուհիներից մեկը՝ Շիռլի Բեսին: