«Փաստ». Ինչպես են աշխատում ԱԺ պատգամավորները

«Փաստ» օրաթերթը գրում է.

«Փաստը» շարունակում է անդրադառնալ Ազգային ժողովի պատգամավորներին՝ ընթերցողին ներկայացնելով մեր պատգամավորների՝ ԱԺ–ի նիստերի ընթացքում ցուցաբերած ակտիվությունը:

Այսօր կանդրադառնանք ՀՀԿ անդամներ Կարինե Աճեմյանին, Վարդան Այվազյանին և ԲՀԿ–ականներ Արայիկ Աղաբաբյանին և Բազմասեր Առաքելյանին, ովքեր պատգամավորական մանդատը ստանալուց հետո ոչ մի անգամ որևէ օրենսդրական նախաձեռնությամբ հանդես չեն եկել: Հատկանշական է, որ բոլորն էլ իրենց նախընտրական քարոզարշավի ժամանակ խոստանում են մեծ փոփոխություններ իրականացնել, բայց շատերը ԱԺ–ում զբաղված են միայն այո կամ ոչ ասելով օրենսդրական նախաձեռնություններին:

Այս չորս պատգամավորներից իր ակտիվությամբ առանձնանում է հանրապետական Վարդան Այվազյանը, ով չնայած 165 նիստից բացակայել է, բայց անցած չորս տարիների ընթացքում ավելի քան 30 անգամ ելույթ է ունեցել Աժ ամբիոնից և 36 անգամ էլ՝ հարց հնչեցրել: Այվազյանը կողմ է քվեարկել 685 օրենսդրական նախաձեռնության, դեմ 7 և ձեռնպահ' 7 անգամ: Վերջինիս դրամական միջոցները պատգամավոր ընտրվելու ժամանակ և այսօր մեծ փոփոխություն չեն կրել՝ 2012 թ. նա ունեցել է մոտ 42 միլիոն դրամ, իսկ նախորդ տարվա տվյալներով՝ 47 միլիոն 730 հազար դրամ: Վերջինիս կենսագրությունից իմանում ենք, որ նա կաթի գործարանի հասարակ ապարատավարից դարձել է արտադրամասի պետ, այնուհետև Չարենցավանի քաղաքապետ, բնապահպանության նախարար և այսօր էլ պատգամավորական մանդատ ունի: Հիշեցնենք, որ սրանից չորս տարի առաջ Այվազյանի անունը բավական շատ շրջանառվեց մամուլում՝ կապված Միացյալ Նահանգների Նյու Յորքի հարավային շրջանի Դատական ակտերի կատարման ծառայության կողմից պատգամավորից հօգուտ «Գլոբալ Գոլդ Մայնինգ» ՍՊԸ–ի՝ երեսունյոթ միլիոն հինգ հարյուր երեսունյոթ հազար ԱՄՆ դոլար գանձելու պահանջով:

Հանրապետական կուսակցության անդամ Կարինե Աճեմյանը 5 անգամ է ելույթ ունեցել խորհրդարանում, 58 օր բացակայել է, 48 անգամ հարց տվել, 820 անգամ կողմ քվեարկել օրինագծերի և միայն 7 անգամ՝ դեմ: Նշենք, որ նա կողմ է քվեարկել նաև «1000 դրամների» օրինագծին: Աճեմյանի դրամական միջոցները պատգամավոր դառնալու ժամանակ եղել են 5 միլիոն 907 հազար, ինչից ըստ 2015 թ. տվյալների՝ ոչինչ չի մնացել: Նշենք, որ Կարինե Աճեմյանը բավական խայտաբղետ կենսագրություն ունի՝ նա և՛ երաժիշտ է, և՛ դերասան, և՛ մենեջեր, և՛ ռեժիսոր, և՛ պատգամավոր: Ուրիշ ի՞նչ է պետք երջանիկ լինելու համար:

Գոնե մեկ անգամ ԱԺ ամբիոնին է մոտեցել նաև ԲՀԿ–ական պատգամավոր Բազմասեր Առաքելյանը, ով այս 4 տարիների ընթացքում ընդամենը 5 հարց է հնչեցրել, 88 անգամ ընդհանրապես չի քվեարկել, ձեռնպահ է մնացել 96 անգամ, 562 անգամ դրական է արձագանքել ԱԺ–ում քննարկվող օրինագծերին: Եթե 2012 թ. նա դրամական միջոցներ չի ունեցել, ապա 2015 թ. հայտարարագրի համաձայն՝ 14 միլիոն 705 հազար դրամ է ունեցել: Հիշեցնենք, որ Առաքելյանը դեռևս նոր պատգամավոր դարձած ժամանակ կայքերից մեկին տրված հարցազրույցում նշել էր, թե անելու է ամեն ինչ՝ որպեսզի օրենքներն ի շահ ժողովրդի ծառայեն։

Նշված պատգամավորներից միայն Արայիկ Աղաբաբյանն է, որ երբևէ ելույթ չի ունեցել, միայն մեկ անգամ մի հարց է տվել, բացակայել է բավական քիչ՝ 27 անգամ: Աղաբաբյանը չի քվեարկել 146 անգամ, կողմ լինելու կոճակը սեղմել է 538, իսկ դեմ լինելունը՝ 63 անգամ: ԲՀԿ–ական պատգամավորը 2012 թ. ունեցել է 21 միլիոն 143 հազար դրամ, իսկ 2015 թ. մի փոքր ավելի՝ 28 միլիոն 301 հազար դրամ:

Շարունակությունը' «Փաստ» օրաթերթի այսօրվա համարում: