Ըստ Ռուստամյանի՝ «նախկին դաշնակցական» չի լինում

Նույնիսկ «Դաշնակցություն»-ից դուրս եկածները շարունակում են կրել ՀՅԴ գաղափարախոսությունը: Ազգային ժողովում լրագրողների հետ զրույցում անդրադառնալով այն լուրերին, թե Ռուբիկ Հակոբյանը պատրաստվում է վերադառնալ հարազատ «Դաշնակցություն»,-ասաց ՀՅԴ խմբակցության ղեկավար Արմեն Ռուստամյանը:

«Նրանք, ովքեր եղել են դաշնակցության մեջ, պատահական չեն եղել: Նրանք բոլորն էլ ընդունել են դաշնակցության գաղափարախոսությունը, եւ հիմա, եթե դուրս են այդ կառույցից, այնուամենայնիվ, շարունակում են մնալ այդ գաղափարախոսության կրողները»,-ասաց դաշնակցական պատգամավորը՝ ոչինչ չբացառելով:

Հարցին՝ եթե շարունակում են կրել այդ գաղափարախոսությունը, ինչո՞ւ պետք է լքեն կուսակցությունը, ասել է. ««Դաշնակցության» կառույցից շատերն են կարգապահական որոշակի ռեժիմի մեջ չտեղավորվելով՝ դուրս եկել. Գարեգին Նժդեհ, Անդրանիկ ... էսպիսի դեմքեր են եղել, բայց դա չի նշանակում, որ նրանք չեն շարունակել իրականացնել նույն գաղափարախոսությունը»,-հավելեց Ա. Ռուստամյանը:

Ինչ վերաբերում է ՀՀԿ-ի հետ դաշինք կազմելուն և ֆինանսական խնդիրներին, պատգամավորը վստահեցրեց, որ ՀՅԴ-ն ինքնաֆինանսավորվող կառույց է, որը միշտ էլ ֆինանանսավորվել է նույն ձևաչափով:

«Հիմա դժվար է ասել, քանի որ հստակեցնելու շատ խնդիրներ կան, ծրագրեր, այս պահին մեր որոշումը հստակ է՝ մենք ընտրություններին գնալու ենք առանձնաբար»:

Այնուամենայնիվ, պատգամավորը չի բացառում, որ այդ որոշումը ևս կարող է փոխվել:

Հարցին՝ ՀՀԿ-ի հետ դաշինքը չի՞ սասանել իրենց մշտական 5-6 տոկոս ընտրազանգվածի հնարավորությունը, պատգամավորն ավելացրեց. «Դաշնակցության մշտական տոկոսը երբեք չի սասանվել, որովհետեւ հենց դա բնորոշ է գաղափարական կուսակցություններին: Այո՛, նրանց տոկոսը կարող է շատ թռիչքային փոփոխություն չունենա, բայց կայուն է: Մենք նվազագույն շեմը հաղթելու խնդիր չունենք»:

Ռուստամյանը վստահեցրեց նաև, որ «Դաշնակցություն»-ը տարաձայնություն չունի և չի էլ ունեցել դրսի կառույցների հետ: