Ընդդիմադիր դաշտում ես կամ ու կլինեմ. Ռուբեն Հակոբյան

Պատգամավոր Ռուբեն Հակոբյանը բացարձակ անհեթհեթություն է որակում մամուլում տարածված այն տեղեկությունները, թե ինքը փորձել է վերաանդամագրվել «Դաշնակցությանը», սակայն նրա հարազատ կուսակցությունից հրաժարվել են իրեն ընդունել:

«Նույնը ժխտել են նաև «Դաշնակցություն»-ից: Լրագրողների մի տեսակ կա, որ կարծում ու պնդում է, թե իրականությունն է ասում: Ափսոսում եմ, որ այդ մասնագիտության տեր մարդն այդքան աներես կարող է լինել»,- Խորհրդարանում լրագրողների հետ զրույցում նշեց պատգամավորը:

Անդրադառնալով իր քաղաքական հետագա գործունեությանը՝ Ռուբեն Հակոբյանը շարունակեց պնդել, որ հաջորդ խորհրդարանական ընտրություններին մասնակցելու շուրջ ինքն առայժմ հստակ որոշում չի ընդունել: «Դեռ որոշում չունեմ: Երևի կմնամ քաղաքական գործունեության մեջ: Թե իմ դրսևորումն ինչպիսին կլինի, ես չեմ որոշել, սակայն շուտով կորոշեմ: Որևէ հանդիպում կամ քննարկում ես չեմ անցկացնում»,- հավաստիացրեց նա՝ ընդգծելով նաև, որ հունվարին հավանաբար իր որոշման մասին բոլորը կիմանան:

Ամեն դեպքում՝ Հակոբյանն իրեն պատկերացնում է ընդդիմադիրի դիրքերում և ընդծում է, որ իրեն իշխանության մեջ չի տեսել ու չի տեսնում: ««Դաշնակցության» ներկայացուցիչներն իմ ընկերներն են և մենք ամեն օր միասին ենք լինում: Քիչ առաջ էլ «Դաշնակցության» սենյակից եմ դուրս եկել, բայց հավատացեք, երբեք այս թեմայով որևէ քննարկում չի եղել»,- ասաց նա:

Պատգամավորը դժվարացավ ասել՝ այդպիսի քննարկումներ կլինեն, թե՝ ոչ, սակայն նշեց, որ դեռ հայտնի չէ, թե քաղաքական քարտեզը վերջում ինչ պատկեր կունանա: Հայաստանում քաղաքական դաշտն, ասաց, անկայուն է ու այս պահին կարող է տարբեր վերաձևումներ տեղի ունենան, հետևաբար, ոչինչ բացառել չի ուզում, քանի դեռ ժամանակ կա: «Ես չգիտեմ՝ ինչ զարգացումներ կլինեն, բայց ընդդիմադիր դաշտում ես կամ ու կլինեմ»,- ասաց նա:

ԼՈՒՐԵՐ.com-ի դիտարկմանը՝ հնարավո՞ր է հանդես գաք որպես առանձին ուժ, ինչպես մյուսները, պատգամավորը պատասխանեց՝ ոչ. «Այ, էդ մեկը հաստատ բացառում եմ»:

Ինչ վերաբերում է «Ժառանգության» հետ կապերին, Հակոբյանը վստահեցրեց, որ այդ ուժի հետ ինքը որևէ խնդիր այսօր էլ չունի, նույնիսկ շփվում է կուսակցության ներկայացուցիչների ու ղեկավար կազմի հետ, սակայն այստեղ խնդիրը զուտ գաղափարական մոտեցումներն են: «Մեր կապերը շատ լավ են, Րաֆֆիին հարգում եմ, իրար հետ շփվում ենք, բայց ընդհանուր քաղաքական հստակ տարաձայությունների խնդիր կար, ինչն էլ ստիպեց դուրս գալ «Ժառագություն»-ից: Թե՛ արտաքին, և թե՛ ներքին քաղաքական հարցերում ես ի սկզբանե ունեցել եմ իմ սկզբունքները, որոնք երբեք էլ չեմ փոխել, և հենց այդ տարաձայնությունների պատճառով էլ դուրս եկա այդ խմբակցությունից»,- ասաց նա: