Իմ արարքում հակաօրինական ոչինչ չկա. պատգամավորը՝ լրագրողին հասցրած ապտակի մասին

Պատգամավոր Ռուբեն Հակոբյանը չի թաքցնում, որ լրագրող Վահե Մակարյանին ապտակ է հասցրել, իսկ թե իրականում ով է մեղավոր եղել, քննությունը ցույց կտա: Աժ-ում լրագրողների հետ զրույցում պարզաբանելով տեղի ունեցած միջադեպը՝ պատգամավորը հայտարարեց, որ լրագրողն ուղղակի անցել է սահմանը և ինքը հարցազրույցի ընթացքում հասկացել է, որ գործ ունի հասարակ խուլիգանի հետ.

«Եթե իմ արարքում կա հակաօրինական որևէ քայլ, ես պատրաստ եմ ներողություն խնդրել, սակայն դա ցույց կտա ժամանակը: Դուք ներկա էիք հարցազրույցին, և տեսաք, որ ես նորմալ շփվում էի լրագրողների հետ: Ես էլ եմ եղել լրագրող, բայց խուլիգան չեմ եղել: Երբ զրույցի ընթացքում նա մուտք գործեց, ես մի քանի անգամ ասացի, որ հարց տալու իրավունքը լրագրողինն է, չպատասխանելը կամ ցանկացած այլ պատասխանը՝ մեր: Նա ասաց, թե իր պատասխանից չեմ հասկանում, և դա պետք է խմբագրին զանգել ու ասել: Այլ խոսքով՝ պետք է խմբագրին բողոքել, բայց երբ ավարտվեց հարցազրույցը, լարվածություն կար: Նա իրեն ամենավերջին խուլիգանի նման պահեց, նույնիսկ հայտարարեց, թե ես էթիկայի կանոններն եմ խախտում, ինձ կդաստիարակի, ես հասկացա, որ գործ ունեմ ոչ թե լրագրողի, այլ հասարակ խուլիգանի հետ և գտա, որ իսկապես դաստիարակելու բան կա, պետք է դաստիարարկել»,- մանրամասնեց պատգամավորը՝ նշելով, որ լրագրողը դեպքի մասնրամասները ներկայացնելով, պատգամավորին որպես հանցագործ է ներկայացրել, սակայն դա այդպես չէ:

«Նա, հանդես գալով որպես զտարյուն էթիկայի հանձնաժողովի նախագահ, ինձ հանցագործի պես է ներկայացրել: Սուտ է: Պազապես նա չկարողացավ ինձ տալ դաստիարակության այն չափը, որը ես տվեցի նրան, իսկ եթե այստեղ կա հակաօրինական որևէ բան, կարող է դիմել օրենքին: Նա հայտարարեց, որ հարցը նույնիսկ կարող է տղայականով լուծել, բայց ես կարծում եմ, որ իմ արարքում հակաօրինական ոչինչ չկա»,- եզրափակեց պատգամավորը: