Մենք գիտենք, թե մեր հարևանների հետ ինչ արգումենտներով ենք խոսելու. Կարեն Կարապետյան

ՀՀԿ խմբակցության պատգամավոր Շիրակ Թորոսյանը կառավարության հետ հարցուպատասխանի ժամանակ ՀՀ վարչապետ Կարեն Կարապետյանից հետաքրքրվեց, թե վերջինս ինչպես է վերաբերում ադրբեջանական SOCAR ընկերության պատրաստակամությանը՝ գնելու Վրաստանի «Նավթի ու գազի կորպորացիա» պետական ընկերության ակցիաների 25 տոկոսը:

«Ադրբեջանն այսպիսով նպատակ ունի շրջափակման ենթարկել տարածաշրջանը և մասնավորապես Հայաստանին: Եթե գործընթացը ստանա ամենաանցանկալի ընթացքը, ապա ինչպիսի՞ն կլինի մեր կառավարության դիրքորոշումը, եթե առաջիկա օրերին գազամուղը հանվի աճուրդի»,- հարցրեց նա։

Վարչապետը նախ ընդգծեց՝ վստահ չէ, որ այդ գործարքը շուտով կլինի, ապա հավելեց, որ տրանզիտ ապահովող խողովակի 25 տոկոսի տերը լինելով՝ ադրբեջանական կողմը դժվար թե մտահոգություն առաջացնի։

«Ի՞նչ քայլեր կանի կառավարությունը, եթե Վրաստանը որոշի գազամուղն ամբողջությամբ վաճառել»,- արձագանքում պնդեց պատգամավորը, որին ի պատասխան՝ վարչապետն հավելեց.

«Եթե նման զարգացում լինի, մենք գիտենք, թե ինչ արգումենտներ ունենք՝ մեր հարևան երկրի հետ խոսելու։ Եթե 25 տոկոս սեփականությունը վաճառելու դեպքում մենք անհանգստություն արտահայտենք, ապա վտանգ ունենք առնվազն ոչ կոռեկտ գտնվելու, որովհետև դա իրենց սեփականությունն է և իրենք մեկ քառորդն են վաճառում, բայց եթե զարգացումներ լինեն, մենք մեր արգումենտները կներկայացնենք»։