Նորածնի մահվան դեպքով պապիկը նոր մանրամասներ է պատմում

Ինչպես արդեն տեղեկացրել ենք, օրեր առաջ 4 օրական նորածին էր մահացել Երևանի Մուրացան հիվանդանոցում: Մահացած նորածնի հարազատները պնդում են, թե երեխան մահացել է ծնունդն ընդունող բժշկի՝ Արմավիրի բժշկական կենտրոնի մանկաբարձագինեկոլոգիական բաժանմունքի վարիչ Նշան Գևորգյանի մեղքով:

ԼՈւՐԵՐ.com-ի թղթակցի հետ զրույցում, մահացած նորածնի պապիկը՝ Ռուստամ Իսայանը մեղադրեց ծնունդն ընդունող բժշկին: Ըստ նրա՝ ծննդկանին իր ֆիզիոլոգիական կառուցվածքի համար ցուցված է եղել միայն կեսարյան հատում, սակայն բժիշկը, չգիտես՝ ինչու որոշել է, որ կինը պետք է ծննդաբերի բնական ճանապարհով: 

«Մինչ ծննդաբերելը ոչ մի խնդիր չի ունեցել, բոլոր հետազոտությունները անցել է ամեն ինչ նորմալ է եղել: Ծննդաբերության օրը մեզ ասացին ամեն ինչ նորմալ է, երեկոյան 6-ին կծննդաբերի: Ծննդաբերությունից րոպեներ առաջ ասացին, որ դժվար է ծննդաբերում»,- ասաց նա՝ ավելացնելով, որ երեխային աքցանով են քաշել, գլուխը սեղմել, որի պատճառով էլ երեխան մահացել է:

Փաստորեն, փոքրիկի օրգանիզմը վնասվել է աքցանի օգտագործման հետևանքով և նորածնի գլխուղեղում ի հայտ են եկել արյան զեղման նշաններ:

Ծննդաբերությունից հետո ևս, ծննդատանը հարազատներին  ասել են, որ ամեն բան նորմալ է. «Երեխան ձայն է հանել, հարսի սկեսուրը հետաքրքրվել է՝ գուցե երեխան լավ չէ՞, ասել՝ են երեխա է, դժվար ծննդաբերություն է եղել, ձայն է հանում: Հաջորդ օրը կաթ ուզեցին, գնացի դեղատնից բերեցի, տվեցին, ասացին՝ երեխան կերել է, ամեն ինչ նորմալ է: Գիշերը՝ ժամը 1-ին երեխան վատացել է ու առանց մեզ տեղեկացնելու կանչ են արել Մուրացանի վերակենդանացման բաժանմունքից, որ երեխային տանեն: Մուրացան հիվանդանոցում, երեխային մեկ ու կես ժամ հետազոտելուց հետո, մեզ ասացին, որ երեխայի վիճակը վատացել է: Արյուն ուզեցին, գնացի Զեյթունի ինչ-որ կենտրոնից արյուն գնեցի երեխայի համար: Հաջորդ օրը ասացին, որ երեխան մահացել է»:

Մահացած նորածնի պապիկը մեղադրում է ծննունդն ընդունեղ բժշկին՝ Նշան Գևորգյանին: Սակայն, չեն պատրասվում որևէ բան անել, ինչպես նշեց նա՝ «ինչ անենք, ոչինչ չենք կարող անել նրան»:

Երկու օր շարունակ, մենք ևս փորձեցինք կապ հաստատել Արմավիրի բժշկական կենտրոնի մանկաբարձագինեկոլոգիական բաժանմունքի վարիչ Նշան Գևորգյանի հետ, բայց ապարդյուն, նրա հեռախոսն այդպես էլ չէր պատասխանում: 

Նշենք՝ ըստ մամուլում տարածված տեղեկությունների, Արմավիրի բժշկական կենտրոնի մանկաբարձագինեկոլոգիական բաժանմունքի վարիչ Նշան Գևորգյանը նախկինում արդեն մեղադրվել ու դատապարտվել է երեխաների մահվան համար: Բայց երբեք չի ազատազրկվել ու չի զրկվել բժիշկ աշխատելու իրավունքից:

«Դատալեքս» դատական տեղեկատվական համակարգից տեղեկանում ենք, որ 67-ամյա բժիշկ Նշան Գևորգյանը դեռևս 2007 թվականին «Արմավիր» ԲԿ-ում ստանձնել է տնօրենի պաշտոն: Առաջին անգամ 2013 թվականի դեկտեմբերի 23-ին նա դատապարտվել է 5 տարվա ազատազրկման՝ առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու: Սակայն համաներում է կիրառվել և նա ազատվել է պատիժի կրումից: Այս գործով հաստատված է համարվել նրա մեղավորությունը երկու անձի մահվան դեպքով: 

Նշան Գևորգյանի հանդեպ երկրորդ դատավճիռը եղել է 2015 թվականի օգոստոսի 17-ին: Համաձայն մեղադրանքի՝ նա աշխատել է «Զարիշատ /Արամ/ Մարտինի Մկրտչյանի անվան Արմավիրի Բժշկական կենտրոն» ՓԲԸ-ում՝ որպես մանկաբարձագինեկոլոգիական բաժանմունքի վարիչ: 2014 թվականի փետրվարի 25-ին մանկաբարձական անվճար բժշկական սպասարկման ծրագրով իրականացվող կեսարյան հատում վիրահատություն կատարելու համար հղի կնոջ սկեսուր Բավական Սիմոնյանից որպես կաշառք պահանջել է գումար: Սկեսուրը մերժել է կաշառք տալ, իսկ նա էլ հրաժարվել է հղի կնոջը բուժօգնություն ցուցաբերել: Այս արարքի համար դատարանը նրան դատապարտել է 1,5 տարվա ազատազարկման: Սակայն կիրառել է նաև Քրեական օրենսգրքի 70-րդ հոդվածը և ազտազրկման ձևով պատիժը փոխարինվել է 2 տարվա փորձաշրջանով:

Հիշեցնենք, որ Արմավիրի մարզի Նալբանդյան գյուղի բնակիչներ Նարինե Բրոյանի և Իսա Իսայանի առաջնեկը ծնվել էր հունվարի 26-ին Արմավիրի բժշկական կենտրոնում, իսկ հունվարի 29֊ին ծանր վիճակով տեղափոխվել Երևան, Մուրացանի վերակենդանացման բաժանմունք, որտեղ էլ երեխան մահացել էր:

Սոնա Հարությունյան