Հանրապետականներն անցել են փորձված մեթոդին…

ԱԺ ըտրություններին մնացել են հաշված ամիսներ, ինչը նշանակում է, որ քաղաքական ուժերի տրամադրության տակ առկա ժամանակն այնքան էլ անսպառ չէ՝ քարոզարշավի օրերին շարքային ընտրողի առաջ ըստ արժանվույնս ներկայանալու. պետք չէ մոռանալ, որ քաղաքական ուժերի գրավչությունը շատ առումներով կախված է լինելու այն կենսական հարցից, թե հատկապես քարոզարշավի օրերին դրանցից ամեն մեկն ինչ է առաջարկելու սեփական ընտրողին:

Դատելով ԶԼՄ-ներում տեղ գտած համապատասխան հրապարակումներից ու ժողովրդի շրջանում ակտիվորեն տարածվող խոսակցություներից՝ Հանրապետականում, կարծես, արդեն իսկ կողմնորոշվել են, թե ընտրությունների նախօրեին կոնկրետ ինչ են առաջարկելու ձայնի իրավունք ունեցող ՀՀ քաղաքացիներին. մարդա 100 դոլար՝ սեփական ձայնը ՀՀԿ-ին վաճառելու դիմաց:

Պարզվում է՝ ռեյտինգային ընտրակարգով առաջադրվող պոտենցիալ թեկնածուներն ու նրանց թիմակիցները, հավատարիմ մնալով կուսակցական ավանդույթներին, ընկնում են դռնեդուռ՝ ՀՀԿ-ական թեկնածուների օգտին քվեարկելու դեպքում քաղաքացիներին խոստանալով կլորիկ գումարներ՝ ընտրողի ձայնը գնահատելով ընդհուպ 100 դոլար: Ու, որպեսզի վստահ լինեն, որ տված փողը «ջուրը չի ընկնի», ու գումար վերցնողները կպահեն խոստումն ու կքվեարկեն ՀՀԿ-ի օգտին, շտաբի անդամներին հրահանգել են ցուցակագրված մարդկանց բացատրել, որ քվեարկության օրը պետք է ընտրական տեղամասերից իրենց հետ դուրս հանեն մնացած, չքվեարկված քվեաթերթիկների խուրձը՝ ապացուցելու սեփական հավատարմությունը Հանրապետականին:

Փաստորեն՝ այն խոսակցություններն ու համառորեն շրջանառվող շշուկները, թե 2017թ-ի ընտրություններում Հանրապետականը ռեկորդային ծավալների հասնող դրամական միջոցներ է ներդնելու՝ ցանկալի արդյունքի հասնելու համար, կարծես հետզհետե արդարացվում են: Բայց ամենահետաքրքրականն այն է, որ, ի հեճուկս բանականության բոլոր օրենքների, նույն ՀՀԿ-ն ներկայացնող պատգամավորները համառորեն ու խիստ հետևողականորեն հերքում են իրենց կուսակցության նկատմամբ հնչող մեղադրանքները, թե նմանատիպ մեխանիզմը վաղուց սպառել է իրեն՝ անարդյունավետ, ու այստեղ որևիցե խնդիր լինել չի կարող: Ավելին՝ նույն ՀՀԿ-ական Հովհաննես Սահակյանի խոսքերով՝ երբ որ հստակություն կլինի, որ այդ քաղաքացիները կասեն՝ իրենց ովքեր են ասել, որ պետք է հանեք, այն ժամանակ էլ կփորձեն պարզաբանել, իսկ հիմա դրա ժամանակը չէ:

Մի խոսքով՝ կրկնվում է այն, ինչին ականատես ենք դարձել երկար տարիներ շարունակ. ՀՀԿ-ն հույսը կրկին դրել է ժողովրդից կթած փողերի վրա ու զոռբայությամբ, փողի ուժով առաջիկայում փորձելու է համապատասխան քվեներ վաստակել հօգուտ իրեն ու հետո էլ հպարտորեն, խիղճը գրպանը դրած՝ հայտարարել, թե իրենք միակն են, որ կարող են պատասխանատվություն ստանձնել Հայաստանի ճակատագրի համար: Թե ինչ կա այդտեղ հպարտանալու, այնքան էլ, անկեղծ ասած, հասկանալի չէ, քանի որ ներկայիս վիճակը բացի ողբից ու կականից մարդու հոգում այլ բան չի առաջացնում:

Մնում է՝ պարզապես հուսալ, որ սեփական ապագան փողով վաճառողների քանակը գոնե այս ընտրություններին շոշափելի չի լինի, ու մեզ կհաջողվի խուսափել շարունակ կրկնվող ողբերգական սցենարից. հասարակությունն՝ իր ամբողջության մեջ, անկասկած, ողջախոհ է ու չի տրվի պահի գայթակղությանը՝ գիտակցելով դրա վտանգները…

Դավիթ ԲԱԲԱՆՈՎ