Բժշկասոցիալական փորձաքննության համակարգում կփորձե՞ն վերացնել կաշառակերությունը

Բժշկասոցիալական փորձաքննության համակարգում (ԲՍՓ) արմատական փոփոխություններ են իրականացվում: Այս մասին այսօր լրագրողների հետ հանդիպման ժամանակ հայտարարեց ՀՀ աշխատանքի և սոցիալական հարցերի նախարար Արտեմ Ասատրյանը: 

Նախարարի խոսքով՝ համակարգում իրականացվելիք վերանայումներից, փոփոխություններից հետո առաջարկություններն ու նախագծերն ուղարկվել են կառավարության աշխատակազմ: Ըստ նրա՝ հիմնական փոփոխությունները կատարվել են այն հարցերում, թե քաղաքացին ինչպես պետք է դիմի համակարգին, ում հետ պետք է շփում ունենա և այլն: 

«Դիմողը չի տեսնելու ու չի շփվելու որոշում կայացնողի հետ: Առողջապահության նախարարության հետ քննարկել ենք, թե ինչպես պետք է հստակեցվեն քաղաքացու օբյեկտիվ զննման կարգը, ինչպես պետք է տարանջատվեն գործառույթները և այլն: Այս ամենն ինքնանպատակ չէ»,-ասաց Ասատրյանը և հավելեց, որ փոփոխություններ են կատարվելու նաև հաշմանդամության կարգ ստանալու, հաշմանդամության կարգ ստացածների մասին որոշումները և այլն: 

Նախարար Ասատրյանի հանձնարարականով՝ բժշկասոցիալական փորձաքննության բարեփոխումների շրջանակներում կստեղծվի հաշմանդամություն ունեցող անձանց բժշկասոցիալական փորձաքննության բժիշկ-փորձագետների տվյալների բանկ:

Ի դեպ՝ դեկտեմբերի վերջին կաշառք ստանալու կասկածանքով ձերբակալվել էր Բժշկասոցիալական փորձաքննության գործակալության պետ Արմեն Սողոյանը: ՀՀ Ազգային անվտանգության ծառայության կողմից իրականացված օպերատիվ-հետախուզական միջոցառումների արդյունքում ձեռք բերված նախնական տվյալներով՝ ՀՀ բժշկասոցիալական փորձաքննության գործակալությունում ձևավորվել և տևական ժամանակ գործել է կոռուպցիոն սխեմա, որի միջոցով պաշտոնատար անձինք ստացել են կաշառքներ և դրանք փոխանցել իրենց վերադասներին: 

Գործակալության պետ Սողոյանի աշխատասենյակում կատարված խուզարկության արդյունքում հայտնաբերվել էր հանձնաժողովների նախագահներից այդ օրվա ընթացքում ստացված, որոշակի ժամանակահատվածում հավաքագրված գումարների հերթական մասնաբաժինը՝ 2.547.000 ՀՀ դրամ և 600 ԱՄՆ դոլար, որի գերակշռող մասը եղել է ծրարված: 

Նշենք, որ այս համակարգում կաշառակերության դեպքեր էին բացահատվել դեռևս 2012 թվականին, ինչի արդյունքում աշխատանքից հեռացվել էր գործակալության նախկին պետ Միշա Վանյանը: 

Քրիստինա Աղալարյան