Պատերազմ` յուրայինների դեմ...

Այն, որ ռեյտինգային ընտրակարգը դարձել է, մեղմ ասած, պատուհաս հենց այդ համակարգի ներդրման ամենավառ ջատագովների համար՝ ապացուցում է մարզերում ստեղծված մրցակցային լարված իրադրությունը իշխող կուսակցության ներսում՝ ռեյտինգային ցուցակներում իրենց տեղն ամրապնդելու համար: Անշուշտ, նման հակասությունները չեն կարող ծառայել ի շահ իշխող քաղաքական ուժի, որն առանց այդ էլ դժվարին ժամանակներ է ապրում: Իշխանությունները այս պահին զբաղված են ոչ այնքան նախընտրական ծրագրերով, գաղափարախոսական-քարոզչական աշխատանքներով, որքան սեփական թիմի ներսում առաջացած կոնֆլիկտները հարթելով: Մեկը հարթում են, մյուսն է ի հայտ գալիս..

Նման իրավիճակ է ստեղծվել Արմավիրի մարզում, որտեղ մի կողմից ՀՀԿ–ն ներկայացնում է տեղի երիտասարդական թևը՝ հանձին Նվեր Պետրոսյանի, ով մարզպետարանի աշխատակից է: Ի դեպ, նա ներկայացնում է մարզպետ Աշոտ Ղահրամանյանի մտերիմ շրջապատը: Մյուս հավակնորդն էլ Արմավիրի քաղաքապետ Ռուբեն Խլղաթյանը, ով բոլոր հնարավոր միջոցներով արդեն իսկ փորձում է «չեզոքացնել» Նվերին: Փաստորեն մարզում ՀՀԿ դիրքերը սասանվում են ՝ ընդ որում, ոչ թե ուժեղ մրցակիցների առկայության, այլ սեփական գզվրտոցի պատճառով:

Թերևս ՀՀԿ-ները մանդատի համար պայքարը վեր են դասում կուսակցության գլոբալ շահերից և առաջնորդվում են «մեզնից հետո թեկուզ ջրհեղեղ» կարգախոսով: Հաշվի առնելով երկրում ստեղծված ծայր աստիճան անկայուն սոցիալ-տնտեսական և քաղաքական իրավիճակը՝ այս կարգախոսով առաջնորդվում են ոչ միայն շարքային ՀՀԿ-ները: Մյուս կողմից, ինչպես տեսնում ենք, ընդգծվում է պայքարը երիտասարդ ամբիցիոզ հանրապետականների և «քաղաքական մավրերի» միջև, որոնք ոչ մի կերպ չեն ցանկանում զիջել իրենց տեղը հանրապետական մատաղ սերնդին:

Փաստացի ՀՀԿ-ն եթե ոչ այսօր, ապա վաղը կանգնելու է քաղաքական սերնդափոխության լուրջ խնդրի առջև, եթե իհարկե նման զարգացումները մտնում են ՀՀԿ պլանների մեջ: Մինչ ՀՀԿ ղեկավարությունը խոսում է քաղաքական դաշտի առանցքային ուժ լինելու և բոլոր քաղաքական ուժերին մրցակից դիտարկելու մասին՝ դեռևս ամենաթեժ նախընտրական մրցակցությունը ընթանում է հենց հանրապետականի ներսում և հանրապետականի միջև:

Փաստացի ՀՀԿ համար ընտրություններին ընդառաջ թիվ մեկ գլխացավանք է դառնում սեփական կուսակիցներին փառասիրությունը և քաղաքական ամբիցիաները բավարարելու անկառավարելի ձգտումը: Երբ այս ամենը զուգորդվում է ընտրությունների նախօրեին՝ դա հանգեցնում է քաղաքական կատարյալ քաոսի, ինչին էլ այսօր ականատես ենք լինում ՀՀԿ-ում: Արմավիրի մարզը ընդհամենը մեկն էր հանրապետության այն մարզերի և քաղաքների թվում, որտեղ հանրապետական թեկնածուների միջև իսկական պատերազմ է ընթանում: Ով հաղթող դուրս կգա՝ դեռ պարզ չէ, սակայն մի բան ակնհայտ է՝ ստեղծված իրավիճակում ՀՀԿ-ն միանաշանակ պարտվողի դերում է....

Ստելլա ԽԱՉԱՏՐՅԱՆ