Ո՞վ է անփույթը

Ինչպես արդեն տեղեկացրել ենք, որոշ զինծառայողների զինգրքույկներից ջնջել են ապրիլյան մարտական գործողողությունների մասին տեղեկությունը: ԼՈւՐԵՐ.com-ի թղթակցի հետ զրույցում Պաշտպանության նախարարության տեղեկատվության և հասարակայնության հետ կապերի վարչության պետ Գևորգ Ալթունյանը նշել էր, որ կա թյուրըմբռնում, ասելով՝ դեպքերը պետք է հստակեցվեն. «Մարդկանց թվում է, օրինակ՝ եթե զորամասը, որտեղ ծառայում է զինծառայողը, գտնվում է սահմանամերձ շրջանում, ապա դա ենթադրում է, որ նա մասնակցել է մարտական գործողությունների, կամ եթե զորամասի որևէ ստորաբաժանում մասնակցել է մարտական գործողությունների, դա նշանակում է, որ ամբողջ զորամասն ու անձնակազմն է մասնակցություն ունեցել»: 

Սակայն այսօր ԼՂՀ պաշտպանության նախարարությունը հաղորդագրություն է տարածել զորացրված զինծառայողների զինգրքույկներում անվավեր ճանաչված գրառումների վերաբերյալ, որտեղ իրազեկում է, որ 2016թ. ապրիլյան մարտական գործողությունների մասնակցի կարգավիճակ տալու վերաբերյալ՝ գոյություն ունի ՊԲ հրամանատարության կողմից հստակեցված կարգ, համաձայն որի՝ զինծառայողի զինգրքույկի մեջ կատարվում է համապատասխան գրառում. «Ինչ վերաբերում է որոշ զորացրված զինծառայողների զինգրքույկներում արված, իսկ այնուհետև անվավեր ճանաչված գրառումներին, ապա դա բացառապես պայմանավորված է տվյալ զորամասի համապատասխան պաշտոնատար անձի անփութության արդյունքում թույլ տրված վրիպումով»,- ասված է ԼՂՀ ՊԲ-ի տարածած հաղորդագրության մեջ։

Փաստորեն, Գևորգ Ալթունյանը մեզ հետ զրույցում կատարվածը թյուրըմբռնում որակելով, ինքն է հայտնվել թյուրըմբռնման մեջ: Փաստն այն է, որ պաշտոնական հաղորդագրությունը նույն երևույթի վերաբերյալ այլ պարզաբանում է տվել, ինչը նշանակում է, որ իրողությունն առկա է, իսկ Գևորգ Ալթունյանը փորձել է փրկել իրավիճակը:

Հիշեցնենք՝ վերջին շրջանում, զորացրված զինծառայողներն ահազանգում են, որ զինկոմիսարիատում իրենց զինգրքույկներում գրել, ապա կոպիտ ձևով ջնջել են այն հատվածը, ըստ որի՝ զինվորը մասնակցել է ապրիլյան պատերազմական գործողություններին: Զինծառայողները որպես փաստ ներկայացրել են իրենց զինգրքույկները, որտեղ ակնհայտորեն երևում են ջնջված հատվածները:

Սոնա Հարությունյան