Մութ պատմություն՝ Նարկոլոգիական հանրապետական կենտրոնում. ի՞նչ են թաքցնում խնամքով

Երեկ հայաստանյան լրատվամիջոցներով տարածվեց տեղեկատվություն այն մասին, որ Նարկոլոգիական հանրապետական կլինիկայում հիվանդները պատրաստվում են բողոքի ակցիա իրականացնել, քանի որ կլինիկայում բուժվող հիվանդներին այսուհետ սնունդ չեն տրամադրելու: 

Նշենք, որ տեղեկատվության տարածումը բավականին մեծ ընդգրկում ուներ և բողոքի ակցիան լուսաբանելու էին հրավիրվել մեծ թվով լրատվամիջոցներ: 

ԼՈւՐԵՐ.com-ը նույնպես այսօր եղավ Նարկոլոգիական հանրապետական կենտրոնում: Հավաքվել էին մեծ թվով լրագրողներ: Մեկ ժամից ավելի՝ բոլորս կլինիկայում էինք: Չկային ո՛չ բողոքի ակցիա իրականացնողներ, ո՛չ բողոքող հիվանդներ:

Մեզ հետ զրույցում հիվանդներից մեկը՝ տիկին Ազնիվն ասաց, որ ինքն է անձամբ զանգահարել Առողջապահության նախարարություն և հայտնել, որ իրենց այսուհետ չեն տրամադրելու սնունդ:

Մեր ճշտող հարցին՝ իսկ որտեղի՞ց նրան նման տեղեկատվություն, քաղաքացին պատասխանեց. «Դե լսել էի, զանգեցի թեժ գիծ և ասացի, որ մեզ էլ սնունդ չեն տալու, բայց այսօր առավոտյան սնունդը ստացել ենք, էստեղ մեզ շատ լավ են վերաբերվում»,- հավելելով, որ բողոքներ չունի:

Նշեմ, որ մեզ հետ զրույցում թեժ գիծ զանգահարած տիկին Ազնիվը  տալիս էր հակասական պատասխաններ. մեկ նշում էր, որ  լսել է, որ իրենց սնունդ չեն տալու, վիրավորված է, և մեկ էլ ինքն իրեն հակադարձում էր՝ շեշտելով, որ սնունդ ստացել են և խնդիրներ չկան, այսօր բժշկուհու հետ զրուցել են և եկել ընդհանուր հայտարարի:

Հարցին՝ ի՞նչ ընդհանուր հայտարարի մասին է խոսքը, տիկինը նշեց. «Դե, որ սնունդ ենք ստանալու, էլի»:

Տպավորությունն այնպիսին էր, որ կինը տալիս էր նախապես ուղղորդված պաստասխաններ՝ պաշտպանելով կլինիկայի տնօրինությանն ու բուժանձնակազմին:

Աղավնի Սուքիասյան