Կանանց պայքարն էլ սրվեց...

Նոր ընտրական օրենսգրքի համաձայն՝ նոր գումարման Ազգային Ժողովում Էականորեն ընդլայնվելու է կին պատգամավորների ներկայացվածությունը: Դա է պատճառը, որ այս օրերին նախընտրական եռուզեռը չի շրջանցել նաև մեր քաղաքական դաշտի գեղեցիկ սեռի ներկայացուցիչներին: Մասնավորապես, իշխող քաղաքական ուժի շարքերում արդեն իսկ նշմարվել է կին կուսակցականների պայքարի թեժացումը՝ կուսակցության համամասնական ցանկում իրենց անցողիկ տեղերն ապահովելու համար: Ամենաաննախանձելին, թերևս, խորհրդարանական հին հեգեմոն Հերմինե Նաղդալյանի վիճակն է, քանզի վերջինիս հստակ հասկացրել են, որ շանսեր չունի, իսկ եթե անգամ, ծայրահեղ դեպքում՝ նա հայտնվի հաջորդ խորհրդարանում, ինչը մեծ հարցականի տակ է՝ մի շարք պատճառներով, ապա հաստատ՝ այլևս ո՛չ ԱԺ փոխնախագահի պաշտոնում: Դրան հանգեցրած պատճառները շատ են. նախ այն, որ Հերմինե Նաղդալյանը 90-ականներից ԱԺ-ում է, սակայն այդպես էլ հանրության կողմից ընկալելի չդարձավ:

Ինչպես այս օրերին պնդում է մամուլը՝ ՀՀԿ-ում արդեն որոշվել է, թե ԱԺ գործող կին պատգամավորներից ով չի լինելու ԱԺ-ում: Ըստ այդմ, հաջորդ խորհրդարանում ՀՀԿ-ից ներկայացված չի լինի մեծամասնականով ընտրված Կարինե Պողոսյանը, ով վերջերս լքել է ՀՀԿ-ն: Հաջորդ խորհրդարանում չեն լինի նաեւ Մարինե Մարաբյանը, Շուշան Պետրոսյանը, ՄԻԱԿ-ից՝ Նաիրա Կարապետյանը: ՀՀԿ-ական մյուս կին պատգամավորներին՝ Կարինե Աճեմյանին, Ռուզաննա Մուրադյանին ու Մարգարիտ Եսայանին դեռ վերջնական պատասխան չեն տվել՝ կընդգրկե՞ն ՀՀԿ ցուցակում, թե՞ ոչ: ՀՀ արդարադատության նախարար Արփինե Հովհաննիսյանը լինելու է ՀՀԿ համամասնական ցուցակի առաջին քառյակում:

Ի դեպ, բավականին հետաքրքրական է պատգամավոր Շուշան Պետրոսյանի դիտարկումը՝ իր՝ ընտրություններին մասնակցելու հավանականության մասին. «Եթե ստացվի՝ ինչո՞ւ ոչ: Ես պատրաստ եմ աշխատել, ես միշտ ցանկություն ունեմ ծառայելու երկրին: 4 տարի ծառայել եմ, հիմա էլ պատրաստ եմ»- ասել է նա: Տարօրինակ է. իսկ մենք չգիտեինք, որ 4 տարի խորհրդարանում բացառապես կոճակ սեղմելը համարվում է ծառայություն, այն էլ՝ երկրին: 

Ինչ վերաբերվում է քաղաքական դաշտի մեկ այլ կարկառուն ներկայացուցչուհուն՝ Հասմիկ Պողոսյանին, ում մասին ևս խոսվում էր, որ վերջինս կարող է տեղ գտնել կուսակցության համամասնական ցուցակում, ապա այնտեղ կարծես թե որոշել են այս անգամ նրա մշակութային «ջիղը» փոխարինել քաղաքականով։ Հենց Հասմիկ Պողոսյանի խորհրդարան մուտքով՝ արգելափակվելու է նաեւ մշակույթի մեկ այլ ներկայացուցչի՝ Շուշան Պետրոսյանի՝ ցուցակում լինելու հավանականությունը:

Այս անթաքույց համակարտության մեջ առավել ուժեղ են Արդարադատության նախարար Արփինե Հովհաննիսյանի դիրքերը, ով, կարծես թե, անձեռնմխելի է և վստահ կարելի է ասել, որ նոր գումարման խորհրդարանում նրան մենք առիթ կունենանք տեսնելու:

Թերևս այդ դիրքերի ամրությունն է պատճառը, որ Արփինե Հովհաննիսյանի կուսակցական գործընկերուհիները դեմ են, որ տակավին նորաթուխ ՀՀԿ-ական Արփինե Հովհաննիսյանը դառնա ցուցակի առաջին կին թեկնածուն: Ի դեպ, Հանրապետականի ներսում անցկացված հարցումներով էլ ամենաբարձր վարկանիշն ունի հենց Արփինե Հովհաննիսյանը: Բացի դրանից՝ Արփինե Հովհաննիսյանը վայելում է նաեւ վարչապետ Կարեն Կարապետյանի հովանավորությունը: Հենց նրա պնդմամբ՝ ցուցակի առաջին կին թեկնածուն կլինի Արդարադատության ներկայիս նախարարը:

Ստելլա ԽԱՉԱՏՐՅԱՆ