«Մի՛ խեղաթյուրեք, չափի մե՛ջ գտնվեք, սուտասա՛ն». վարչապետների թեժ վեճն՝ ԱԺ-ում

Ազգային ժողովի հերթական քառօրյայի ընթացքում վեճ առաջացավ նախկին վարչապետներ Խոսրով Հարությունյանի և Հրանտ Բագրատյանի միջև: Պատճառը՝ «Բնակարանային հիփոթեքային կրեդիտավորման մասին և կից ներկայացված օրինագծերի փաթեթ»-ն էր:

Պատգամավորները նախագծի մասին հակառակ տեսակետներ ունեն. երկուսն էլ մեկնաբանեցին, թե ինչու են հանգել իրենց կարծիքներին, սակայն զերծ չմնացին փոխադարձ վիրավորանքներից:

Նախագծին դեմ Հրանտ Բագրատյանն իր ելույթում խոսքն ուղղելով Խոսրով Հարությունյանին՝ ասաց, թե վարչապետներից մեկը երեկ լրիվ թյուրիմացության մեջ է գցել պատգամավորներին, դրա համար էլ դահլիճի լույսերն անջատվել են. նույնիսկ հոսանքը չի դիմացել. «Այս նախագիծն այն մասին է, որ մեկին գցել են քացու տակ, ասում ենք՝ ինչի եք սենց բան անում, դուք էլ ասում եք՝ զատո գլխին չենք խփում»,- ասաց Հրանտ Բագրատյանը:

Նախագծին կողմ Խոսրով Հարությունյանն էլ պատասխանեց, թե այս նախագծով սահմանվում են կողմերի միջեւ փոխհարաբերությունների կարգավորման համար բոլոր հնարավոր նորմերը և պնդեց, որ հնարավորություն է տրվում վարկառուին՝ վաղաժամկետ մարել իր պարտավորությունները՝ առանց տույժ ու տուգանք վճարելու:

Պատասխանն առաջացրեց ընդդիմադիր պատգամավորի զայրույթը՝ սո՛ւտ է:

Խոսրով Հարությունյանի կողմից հնչեց պատասխանը. «Մի՛ խեղաթյուրեք, չափի մե՛ջ գտնվեք, սուտասա՛ն»:

«Պարո՛ն Բագրատյան, մի քիչ չափավոր, այդպես չի՛ կարելի»,- խոսակցությանն անմասն չմնաց ԱԺ նախագահ Գալուստ Սահակյանը: