«Սասունցի Դավիթ» կինոթատրոնը կքանդվի, փոխարենը հյուրանոց ու առևտրի կենտրոն կկառուցվի

ՀՀ ԿԱ քաղաքաշինության պետական կոմիտեի նախագահ Նարեկ Սարգսյանն այսօր հրավիրած ասուլիսի ժամանակ ասաց, որ Կառավարությանն են ներկայացրել 2017 թվականին կառուցապատման ներդրումային ծրագրերը, որոնցից 105 մլն դոլարի ծրագրեր համարվել են իրատեսական և դրանք կիրականացվեն 3 տարվա ընթացքում: Ասուլիսի ընթացքում Նարեկ Սարգսյանը ներկայացրեց այն ծրագրերը, որոնք պատրաստվում են իրագործել: Դրանց թվում էր նաև «Սասունցի Դավթի» կայարանամերձ տարածքի քանդումն ու նոր շինարարական աշխատանքներ սկսելը:

«Կայարանամերձ շինությունը կքանդվի և այս տարի կսկսվեն շինարարական աշխատանքները: Նշված տարածքում կկառուցվի բարձր դասի հյուրանոցային համալիր, գրասենյակային, առևտրային համալիր, սակայն այս պահին դա քննարկման փուլում է»:

ՀՀ ԿԱ քաղաքաշինության պետական կոմիտեի նախագահն ընդգծեց, որ խոսքը վերաբերում է այն հատվածին, որտեղ ԽՍՀՄ-ի տարիներին եղել է «Սասունցի Դավիթ» կինոթատրոնը. «Այդ շենքը մնաց հավաքովի կոնստրուկցիայով, հենց այդ հավաքովի բետոնե կարկասը կքանդվի: Ես ներդրողին ոչ թե պարտադրել, այլ առաջարկել եմ հենց այն հատվածում, որտեղ կինոթատրոն է եղել, մի փոքր կինոթատրոն կառուցել և անվանակոչել «Սասունցի Դավիթ», նա էլ համաձայնել է»: