Արագածոտնում կպայքարեն ծանր քաշայինները...
Վերլուծական
Գալիք խորհրդարանական ընտրություններում Արագածոտնի մարզի ռեյտինգային ընտրահամակարգով առաջադրվելու ցանկություն հայտնած թեկնածուները, ի վերջո, ուրվագծվեցին, ինչը թույլ է տալիս առավել ամբողջական պատկերացում ստանալ այս մարզում ծավալվող նախընտրական զարգացումների մասին: Ինչ խոսք, այստեղ բոլոր կուսակցությունները և դաշինքները ջանացել են գործուղել միմյանց արժանի մրցակիցների. դա է պատճառը, որ պայքարը Արագածոտնում խոստանում է առավել քան թեժ լինել: Ազգային Ժողովի նախկին պատգամավոր Մյասնիկ Մալխասյանը ապրիլյան խորհրդարանական ընտրություններին ՀԱԿ-ի ցուցակով ռեյտինգային ընտրակարգով կառաջադրվի Արագածոտնի մարզում:
Այս ընտրատարածքում ՀՀԿ-ից բազմաթիվ ռեյտինգային թեկնածուների անուններ են շրջանառվում՝ պատգամավոր Մնացական Մնացականյան, նախկին պատգամավոր Խաչիկ Մանուկյան, Արագածոտնի նախկին մարզպետ Սարգիս Սահակյանի եղբայրը՝ Նաիրի Սահակյանը, Ապարանի նախկին քաղաքապետ Ռուբեն Հայրապետյանի՝ Գազի Ռուբոյի որդին: Վերջինիս, ըստ տեղեկությունների, պաշտպանում է ՔԿ նախագահ Աղվան Հովսեփյանը: ՀՀԿ-ի թեկնածուների շարքում են նաև Արագած Ախոյանը և Բազմասեր Առաքելյանը:
Արագածոտնի մարզի ՀՀԿ-ի ռեյտինգային ցուցակի կանանց թվում կլինի փոխմարզպետ Նունե Մովսիսյանը, որը նախկին մարզպետ Սարգիս Սահակյանի կադրն էր։ Նախկին մարզպետը տիկին Նունեին դպրոցի տնօրենից դարձրեց փոխմարզպետ, ապա հենց Սահակյանի համառ ջանքերով Մովսիսյանը շարունակեց պաշտոնավարել նաև դաշնակցական մարզպետ Գաբրիել Գյոզալյանի օրոք։ Տեղեկություններ կան, որ ՀՀԿ ցուցակի երկրորդ կինը հնարավոր է լինի շախմատիստուհի Լիլիթ Մկրտչյանը, ով ծնունդով Փարպի գյուղից է։
Արագածոտնի ընտրատարածքը փոքրերից է, և ցուցակում առավելագույնը 8-9 թեկնածու կարող է ընդգրկվել։ ՀՀԿ-ի տղամարդ թեկնածուների անունները ևս հայտնի են. Սարգիս Սահակյանի եղբայրը՝ Նաիրին, նախկին ԲՀԿ-ականներ Բազմասեր Առաքելյանը, Արագած Ախոյանը, ՀՀԿ-ական պատգամավոր Մնացական Մնացականյանը, ՀՀԿ-ական նախկին պատգամավոր Խաչիկ Մանուկյանը, իսկ Ապարանի շրջանի ներկայացուցիչը կլինի գազի վարչության պետ Ռուբեն Հայրապետյանի որդին։
Ինչպես երևում է, այստեղ ևս ռեյտինգային ընտրակարգը թույլ չի տա խուսափել ներքին հակասություններից և միջանձնային հարաբերությունների լարումից՝ հաշվի առնելով՝ ինչպիսի կարկառուն ներկայացուցիչների են կուսակցությունները մարտի նետել: Այս մարզում ևս գերխնդիրը լինելու է ձայն հավաքելը, այդ պատճառով քաղաքական ուժերը ջանացել են մարզում քիչ թե շատ հեղինակություն վայելող անձանց ներառել ցանկում:
Ստելլա ԽԱՉԱՏՐՅԱՆ
ՈՒՂԻՂ ԵԹԵՐ
Ամենադիտված 
Ծնողները մահացել են, 3 երեխաները հիվանդանոցում են. նոր մանրամասներ ողբերգական վթարից
