«Հայաստան» համահայկական հիմնադրամի տեղական մարմինների ղեկավարները՝ Սփյուռքի նախարարությունում

Մայիսի 27-ին ՀՀ սփյուռքի նախարար Հրանուշ Հակոբյանն ընդունեց «Հայաստան» համահայկական հիմնադրամի տեղական մարմինների ղեկավարներին:

Նախարարը, շեշտադրելով Հայրենիք-Սփյուռք գործակցության կարևորությունը և Սփյուռքի ահռելի ներդրումը Անկախ Հայաստանի կայացման գործում, ներկայացրեց ՀՀ սփյուռքի նախարարության գործունեությունը 3,5 տարիների ընթացքում` մասնավորապես կանգ առնելով «Նորավանք» գիտակրթական հիմնադրամի, ԵՊՀ-ի և ՀՀ ԳԱԱ-ի հետ իրականացրած Սփյուռքի հայ համայնքների պատմության և այլ գիտահետազոտական համատեղ ուսումնասիրությունների և դրանց արդյունքում հրապարակված ավելի քան 40 գրքերի վրա:

Հ. Հակոբյանը ներկայացրեց նաև նախարարության «Արի տուն» ծրագիրը` նշելով, որ հայ երեխան ընդամենը երկու շաբաթում շատ ավելի է հայանում և կապվում իր Հայրենիքին, քան վերացական Հայրենիքի մասին իր ունեցած պատկերացումներն են:

Նա անդրադարձավ նաև այս տարի իրականացվելիք «Սփյուռք ամառային դպրոցին», կազմակերպված ավելի քան 27 մասնագիտական համաժողովներին և ընթացիկ այլ ծրագրերին:

Ներկաները գոհունակությամբ արձանագրեցին, որ կատարվել է ահռելի աշխատանք և սիրով համաձայնվեցին առավել սերտ համագործակցել նախարարության հետ: