«Փաստ». «Մերոնք ինձ երևի ԱԺ–ում չեն տեսնում». Շենգավիթի ՀՀԿ կառույցի ղեկավար Մարտին Սարգսյան

«Փաստ» օրաթերթը գրում է.

«Շենգավիթ և Մալաթիա Սեբաստիա համայնքները ներառող ընտրատարածքում ամենաթեժ «մարտերն» են սպասվում հենց ՀՀԿ–ականների միջև: Խնդիրն ան է, որ այս տարածքից ռեյտինգային ընտրակարգով կարող է ընտրվել 2 պատգամավոր, իսկ առաջադրված կարկառուն ՀՀԿ–ականները շատ են, բացի այդ էլ մյուս դաշինքների ու կուսակցությունների թեկնածուների լուրջ մրցակցություն կա:
Շենգավիթի ՀՀԿ կառույցի ղեկավար, Կադաստրի պետական կոմիտեի ղեկավար Մարտին Գրիգորյանը «Փաստի» հետ զրույցում ասաց, որ Շենգավիթում առաջադրվել են համայնքի «արիստոկրատ ներկայացուցիչները», սակայն ինքը ՀՀԿ ոչ ռեյտինգային, ոչ համամասնական ցուցակում չկա, ինչպես նաև՝ իր թաղապետ եղբայր Արմեն Սարգսյանը, սակայն որպես ՀՀԿ շտաբի ղեկավար համակարգում է ընտրական պրոցեսը Շենգավիթում:

Ներկայացնում ենք Մարտին Սարգսյանի հետ «Փաստի» զրույցը:
– Պարոն Սարգսյան, իսկ ի՞նչն է պատճառը, որ Դուք չկաք ՀՀԿ ցուցակում: Նախկինում Դուք Շենգավիթից ընտրված պատգամավոր եք եղել, այս անգամ իշխանությունը Ձեզ չընտրե՞ց:
– Վերջիվերջո՝ կուսակցությունը ինքն է որոշում կայացնում՝ ով պատգամավոր գնա, ով մնա գործադիրում: Ընտրություններից հետո ամեն ինչ պարզ կլինի, նորմալ գործընթաց է: Ես իմ աշխատանքն ունեմ գործադիրում, աշխատում եմ: Շենգավիթից ռեյտինգայինով առաջադրվել է գործող պատգամավոր Արայիկ Հովհաննիսյանը, Ծերեթելիի մանկական հիվանդանոցի տնօրեն Կոլյա Դալլաքյանը, Մետրո թատրոնի տնօրեն Կարեն Միրաքյանը: Այսինքն՝ Շենգավիթը ներկայացրել է մեր արիստոկրատ ներկայացուցիչներին, որոնք վաղը մյուս օրը պետք է կարողանան ԱԺ–ում աշխատել:
– Պարոն Սարգսյան, փաստորեն Դուք արիստոկրատ չէի՞ք, որ Ձեզ չեն ընդգրկել Շենգավիթի ցուցակում:
– ԱԺ–ում ինձ երևի չեն տեսնում: Երևի նպատակահարմար են գտել, որ իրենք օրենսդիր մարմնում ավելի օգտակար կլինեն, մյուսները՝ գործադիրում:
– ՀՀԿ ռեյտինգային թեկնածուներից Սամվել Ալեքսանյանի դե՞մ եք պայքարելու:
– Դեռ պայքար չկա: Դեռ քարոզարշավ չի սկսվել, պարզապես այսօր կուսակցական ժողովներ ենք անում, նախապատրաստական աշխատանքներ ենք տանում, քարոզարշավը որ սկսվի, մենք արդեն նաև մեր ռեյտինգային պատգմավորության թեկնածուներին կկարողանանք ներկայացնել մեր ժողովրդին:
– Քանի որ այս փուլում շատ ուժեղ մրցակցություն է ՀՀԿ–ի ռեյտինգայինների միջև, ինչպե՞ս եք պատկերացնում մրցակցությունն, օրինակ, Սամվել Ալեքսանյանի ու նրա փեսայի հետ:
– Վերջիվերջո, իրենք նույն ՀՀԿ–ի ձայներն են ապահովում: Էստեղ մեր մրցակցությունն այլ դաշտում է: Մալաթիայի և Շենգավիթ համայնքի բնակիչները, եթե կգտնեն՝ ընտրում են Սամվել Ալեքսանյանին և Կորյուն Նահապետյանին, ուրեմն նորմալ ա, որովհետև էս երկու համայնքից 2 հոգի պետք ա անցնի:
– Պատրա՞ստ եք, որ Ձեր համայնքը զոհի իր թեկնածուներին՝ հանուն Սամվել Ալեքսանյանի ու նրա փեսայի:
– Ես չասացի՝ պատրաստ ենք: Ասացի, եթե ժողովուրդը կգտնի նման լուծում, ուրեմն էլի նորմալ ա, կգտնի Արայիկ Հովհաննիսյանը պետք ա անցնի և Կորյուն Նահապետյանը, էլի նորմալ ա, կամ Սամվել Ալեքսանյանն և Արայիկ Հովհաննիսյանը, էլի նորմալ ա:
– Արդեն խոսակցություններ կան, որ ցուցակագրումներ, ընտրակաշառքի խոստումներ են լինում:
– Չէ, մեր մոտ նման բան չկա: Մենք դեռ տեղամասերը բաժանում ենք, տեսնում ենք՝ ովքեր են լինելու շտաբի պետերը և այլն: Մենք դեռ չենք սկսել ոչ քարոզարշավ, ոչ ընտրություններ, մենք ընդամենը նախապատրաստական աշխատանքներ ենք կատարում: Չի կարող էդպիսի խոսակցություններ գնալ: Ցուցակագրումներ չեն արվում:
– Այլ դաշինքներ և կուսակցություններ էլ են ուժեղ թեկնածուներ դրել այդ ընտրատարածքում: Կարծում եք, ռեալ շանսեր ունի՞ ՀՀԿ–ն էդտեղ հաղթանակ արձանագրելու:
– Կարծում եմ, բոլորն էլ մեր արժանի օպոնենտներն են և, իհարկե, պայքարը գնալու է էդ առումով, թե ով նորմալ ծրագրեր կներկայացնի, ում թեկնածուն ժողովրդի կողմից ավելի սիրված կլինի: Վերջը՝ ժողովուրդը որոշում կկայացնի: Շատ բան կախված է լինելու քարոզարշավից, յուրաքանչյուրի ներկայացրած ծրագրից, որովհետև ուրիշ բան ա որ ասում են՝ էսօր կարող ենք միանգամից ամեն ինչ փոխել, գազի գինը զրո դարձնել և այլն, բայց ուրիշ բան է ռեալ կյանքում անել ինչ հնարավոր է»:

Շարունակությունը' «Փաստ» օրաթերթի այսօրվա համարում: