Այվազյան Վարդանին Աստծու չափ հարգում եմ. գյուղապետ

Մամուլում տարածված տեղեկությունների հանաձայն՝ ՀՀԿ-ական թեկնածուների միջև կրկին վեճ է առաջացել: Այս անգամ թունդ  վեճ է եղել Կոտայքի մարզի ՀՀԿ-ականներ՝ Արգելի համայնքապետ Մաթևոս Ավագյանի և ԱԺ պատգամավոր Վարդան Այվազյանի միջև:

ԼՈւՐԵՐ.com-ի թղթակիցը կապ հաստատեց Արգելի գյուղապետ Մաթևոս Ավագյանի հետ, պարզելու՝ եղե՞լ է նման վեճ, թե՝ ոչ, և եթե եղել է, ի՞նչ պատճառով, սակայն գյուղապետը նախ զարմացավ մեր հարցից, այնուհետև պատասխանեց.

«Այվազյան Վարդանն իմ 30 տարվա ախպերն ու ընկերն ա: Մենք իրար Աստծու չափ հարգում ենք: Մենք հալալ զուլալ ընկերներ ենք, մի ընտանիքի նման ենք: Սուրբ ձևով պաշտում ենք իրար: Նման բան չկա, հեսա զանգեմ ախպորս, այսինքն՝ Վարդանին էլի, ասեմ՝ ծիծաղենք»,- ասաց համայնքի ղեկավարը՝ հավելելով, որ «խուժանական լեզվով ասած՝ դա մուտիլովկա է»: 

Խորհրդարանական ընտրությունների նախաշեմին սրվում են անգամ թիմակիցների հարաբերությունները: Վերջին շրջանում հաճախակիացել են վեճերը, հատկապես՝ ՀՀԿ–ական թեկնածուների միջև. փետրվարի 23-ի ուշ երեկոյան էլ ծեծկռտուք էր տեղի ունեցել ՀՀԿ-ական պատգամավորներ Մուրադ Մուրադյանի և Արայիկ Գրիգորյանի թիմակիցների միջև:

Սոնա Հարությունյան