Զգուշացում. ադրբեջանցի օգտատերերը սոցցանցերում դիակների կեղծ նկարներ են տեղադրում՝ հայկականի անվան տակ

«Ադրբեջանական բոլոր կայքերը առայժմ տարածում են Ադրբեջանի ՊՆ պաշտոնական հայտարարությունը, որը, ըստ էության, չի հերքում հայկական կողմի տարածած տեղեկատվությունն այն մասով, որ ռազմական գործողություններ են տեղի ունեցել: Ադրբեջանական ԶԼՄ-ները տարածում են տեղեկատվություն՝ հաստատելով, որ ունեն նաև  զոհեր, թեպետ պնդում են, որ այդ կորուստներն ունեցել են հայկական կողմի հարձակման հետևանքով: Իշխանամետ ԶԼՄ-ները, սակայն, շրջանցում են այն հարցը, թե ինչպե՞ս են Ադրբեջանի բանակի զինվորների դիակները հայտնվել արցախա-ադրբեջանական չեզոք գետում»,- այս մասին ԼՈւՐԵՐ.com_ի հետ զրույցում ասաց Razm.info մասնագիտացված կայքի համակարգող Կարեն Վրթանեսյանը:

Ըստ մեր զրուցակցի՝ ադրբեջանական մեդիա դաշտում խուճապ չկա և հիմնականում ակտիվ տարածվում են պաշտոնական հաղորդագրություններն ու ՊՆ-ի կողմից հրապարակված տեղեկատվությունները: «Իրավիճակն այլ է սոցցանցերում: Ադրբեջանական սոցիալական կայքերում ակտիվորեն  տարածվում են ռուս-վրացական պատերազմի ժամանակ զոհված զինվորների դիակների նկարներ՝ դրանք ներկայացնելով որպես հայ զինվորների դիեր: Իրավիճակն այնպիսին է, որ նույնիսկ ամառվա շրջանի նկարներ են հրապարակվում: Սոցցանցերի ակտիվ օգտատերերը նաև ակտիվորեն քննադատում են Ադրբեջանի իշխանություններին՝ նրանց մեղադրելով երկրում առկա դժգոհություններն ամեն անգամ ռազմական բախումներով ստվերելու քայլերը»: 

Հիշեցնենք, որ այսօր՝ փետրվարի 25-ին՝ ժամը 03:00-ի և 04:00-ի սահմաններում, շփման գծի միանգամից երկու՝ հարավարևելյան (Մարտունի) և արևելյան (Ակնա) ուղղություններով հակառակորդը, օգտագործելով ականազերծման համապատասխան տեխնիկա և հատուկ միջոցներ, ձեռնարկել է հարձակման փորձ:

ՊԲ առաջաջապահ ստորաբաժանումները, նաև շնորհիվ տեսադիտարկման սարքավորումների, երկու ուղղություններում էլ ժամանակին հավաստանշել են ադրբեջանական ստորաբաժանումների առաջխաղացումը և կորուստներ պատճառելով հետ շպրտել ելման դիրքեր: Բանակի առաջապահ ուժերի պատասխան գործողությունների արդյունքում հակառակորդը տվել է զոհեր և վիրավորներ: Մի քանի դիակ գտնվում է չեզոք գոտում: Հայկական կողմը զոհեր ու վիրավորներ չունի:

Աղավնի Սուքիասյան