Դաժան սպանություն Արագածոտնի մարզում․ 20-ամյա տաքսիստին հայտնաբերել են պարանոցը կտրած

shamshyan.com-ը գրում է.

Փետրվարի 26-ին դաժան սպանություն է տեղի ունեցել Արագածոտնի մարզում։

Ժամը 17։30-ի սահմաններում ոստիկանության Թալինի բաժին ահազանգ է ստացվել, որ Երևան-Գյումրի ավտոճանապարհի Թլիկ գյուղի վարչական տարածքում՝ ձնակույտում հայտնված Mercedes կա, իսկ մեքենայից քիչ այն կողմ՝ տղամարդու դի կա։

Ոստիկաններն ու քննիչները Mercedes մակնիշի 35 DX 790 համարանիշի ավտոմեքենայի մոտ հայտնաբերել են պարանոցը կտրած տղամարդու դի։ Դատաբժշկի նախնական եզրակացության համաձայն՝ տղամարդը մահացել է դանակի մի քանի հարվածներից։

Ֆոտոլրագրողի տեղեկություններով՝ մահացածը Երևան քաղաքի բնակիչ, 20-ամյա Կառլեն Գրիգորյանն էր, ով ավտոմեքենան շահագործում էր որպես տաքսի։

Ժամերի ընթացքում նշված սպանությունը կատարելու կասկածանքով Թալինի ոստիկանություն բերման են ենթարկել Գյումրի քաղաքի բնակիչ, ժամանակավորապես Երևանում բնակվող 25-ամյա Վահան Հովսեփյանին։

Կասկածյալը Լենինգրադյան փողոցում նստել է նշված տաքսին և պատվիրել ուղևորություն դեպի Գյումրի։

Արդեն նշված հատվածում նա դանակի մի քանի հարվածներով կտրել է երիտասարդի պարանոցը, որից հետո դին տեղափոխել ավտոմեքենայի հետնամաս և փորձել այդ ավտոմեքենայով սպանության վայրից ճողոպրել, ինչը նրան չի հաջողվել. հայտնվելով ձնակույտի մեջ, նա մեքենան թողնելով՝ դիմել է փախուստի։

Փաստի առթիվ Արագածոտնի քննչական վարչությունում հարուցվել է քրեական գործ՝ ՀՀ քր․օր․-ի 104 հոդվածի 1-ին մասի հատկանիշով։

Կասկածյալ Վ․ Հովսեփյանը ձերբակալվել է։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով' դատարանի' օրինական ուժի մեջ մտած դատավճռով: