Մահացած փոքրիկի հարազատները մեղադրում են բժիշկներին և պատրաստ են անգամ անալիզները հետազոտման տանել արտասահման

Մեկ ամսականում մահացած փոքրիկի մահվան մեջ հարազատները շարունակում են մեղադրել բժիշկներին: Չեն լռելու և պայքարելու են մինչև վերջ: Այս մասին ԼՈւՐԵՐ.com-ի թղթակցի հետ զրույցում ասաց մահացած փոքրիկի տատիկը՝ Անահիտ Սարիբեկյանը:

Բժիշկներն են մեղավոր, թե ոչ՝ կպարզվի միայն հետազոտման արդյունքները ստանալուց հետո:

«Ես մոտեցել եմ բժշկին՝ Լիլիթին, ասել եմ՝ նայի աչքերիս մեջ, ասա, որ նման բան է եղել, բայց ասաց՝ ինքն առողջ ծնունդ է ունեցել, դրանից հետո ինչ է եղել՝ ինքը իրազեկ չէ»,- ասաց մահացած փոքրիկի տատիկը:

Անալիզները հետազոտվում են Հերացու անվան պետական բժշկական համալսարանի դիահերձարանում և արդյունքները շուտով պատրաստ կլինեն. «Ասացին՝ 25 օրից շուտ չի լինի պատասխանը: Երբ հետազոտման պատասխանը գա, կսկսենք մյուս գործընթացները: Հիմա քննչական մարմիններն են զբաղվում, վստահ եմ՝ հետևողական են մեր գործի հետ կապված, բայց քանի դեռ հետազոտման պատասխանները չեն եկել, ասում են՝ սպասեք»:

Անահիտ Սարիբեկյանի խոսքով՝ այժմ սպասում են հետազոտման պատասխանին, որը օրով և ժամով ճշգրիտ ցույց կտա՝ երեխան երբ է հարված ստացել գլխին. «Մնում է իրենք (խմբ.՝ Շենգավիթ ԲԿ-ի բժիշկներին) քայլեր չձեռնարկեն, որպեսզի ճշմարտությունը կոծկվի: Ես պատրաստ եմ մինչև արտասահման տանել անալիզները, երբեք չեմ լռելու»:

Հիշեցնենք,որ մեկ ամսականում մահացած Միքայել Դունամալյանի հարազատները փոքրիկի մահվան մեջ մեղադրում են «Շենգավիթ» բժշկական կենտրոնի բժիշկներին: Փոքրիկը մահացել է գանգի կոտրվածքի հետևանքով: 

Երեխան ծնվել էր հունվարի 10-ին, մահացել է մեկ ամիս անց՝ փետրվարի 10-ին:

Նշենք, որ այս դեպքի առնչությամբ փետրվարի 10-ին քրգործ է հարուցվել՝ Ավան վարչական շրջանի Դանիել Վարուժան փողոցի 8-րդ շենքի 2-րդ բնակարանում մահացած 1 ամսական տղայի մահվան փաստով: Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնում հարուցվել է քրեական գործ՝ ՀՀ քր. օր.-ի 112-րդ հոդվածի 2-րդ մասի 14-րդ կետի (դիտավորությամբ առողջությանը ծանր վնաս պատճառելը, որն անզգուշությամբ առաջացնելը տուժողի մահ) հատկանիշներով: