Ներիշխանական հակասությունները սրվում են...

Որքան ավելի են մոտենում խորհրդարանական ընտրությունները, այնքան սրվում են ներքաղաքական՝ առանց այդ էլ հակասություններով լի գործընթացները: Այս ամենն առաջին հերթին վերաբերում է իշխող «Հանրապետական» կուսակցությանը, որը կարծես թե լուրջ և համակարգային խորության չափում ունեցող խնդիրների առջև է կանգնել: Այս ամբողջ ընթացքում իշխանություններին ոչ միայն չհաջողվեց հիմնավորապես ցրել ներիշխանական հակասությունների մասին կասկածներն ու ներիշխանական լուրջ մրցակցության մասին կանխատեսումները, այլ՝ դրանք, կարծես թե, պարբերաբար հիմնավորվում էին տարբեր իրադարձությունների, տեղեկատվական տարբեր հոսքերի տեսքով:

Դրանց մասին այժմ գուցե ավելորդ է խոսել, քանի որ, թերևս, բոլոր ընթերցողներն էլ կհիշեն այն պարբերական իրադարձություններն ու տեղեկատվական հոսքերը, որոնցից հետո մամուլում և փորձագիտական շրջանակներում, նաև հաճախ քաղաքական դաշտում սկիզբ էր առնում ներիշխանական բազմաբևեռության և կենտրոնախույզ գործընթացների լրջության մասին դատողությունների հերթական ալիքը: Կարելի է, ինչպես ցանկացած աֆորիզմ, վիճարկել նաև «ծուխն առանց կրակի չի լինում» ասույթը, բայց տվյալ դեպքում Հայաստանի իշխանական դաշտում առկա իրավիճակը ավելի շատ ոչ թե վիճարկելու, այլ այդ աֆորիզմը հաստատելու հիմքեր է տալիս:

Գլխավոր հակասությունները անշուշտ կապված են ռեյտինգային ընտրակարգի հետ, մասնավորապես այսօր, ԱԺ ՀՀԿ խմբակցության անդամ Կարեն Կարապետյանը հայտարարեց, որ ինքը, մասնավորապես դեմ է քվեարկել այս համակարգի ներդրմանը, սակայն այսօր ունենք այն, ինչ ունենք: Կարապետյանը կարծում է, որ այս համակարգը լարվածության աճի է հանգեցրել, և դա ակնհայտ է՝ ապացույցը իշխանական ճամբարում ընթացող անզիջում պայքարը, որն էլ հանդիսանում է ներիշխանական հակասությունների թնջուկի ձևավորման գլխավոր պատճառը... Պատգամավորը նաև հավելել է, որ իշխանություններին չսիրելու օբյեկտիվ պատճառը տարիներ ի վեր շարունակվող թալանն է՝ ինչ խոսք սա ազնիվ մոտեցում է և ճշմարտախոսության օրինակ, որը պետք է վարակիչ դառնա նաև քաղաքական մյուս այրերի համար: Չէ որ միայն սեփական սխալները ընդունելով և շտկելով է հնարավոր հարթել առաջընթացի ուղղին՝ նվազագույնի հասցնելով նաև ներիշխանական հակասությունների առաջացման հավանականությունը...

Ստելլա Խաչատրյան