ՀՀԿ-ն հո կոմկուս չէ՞. Շարմազանովը՝ Կարեն Կարապետյանի քննադատությունների մասին

Այսօր ԱԺ-ում լրագրողների հետ զրույցում ԱԺ փոխնախագահ Էդուարդ Շարնազանովն անդրադարձավ իր կուսակից ընկեր, ԱԺ ՀՀԿ խմբակցության պատգամավոր Կարեն Կարապետյանի՝ ՀՀԿ-ից դժգոհելուն և կուսակցության վարկանիշի անկման մասին նրա արտահայտած մտքերին՝ նշելով. «Յուրաքանչյուրս ունենք մեր կարծիքը, և շատ նորմալ է, երբ լինում են տարբեր քննարկումներ, կողմ և դեմ ձայներ: Այո՛, պարոն Կարապետյանը ունեցել է իր կարծիքը: ՀՀԿ-ն հո կոմկուս չէ՞: Սակայն  որոշումներ կայացնելուց հետո բոլորս միակամ ենք  լինում»:

Դիտարկմանը, որ ՀՀԿ-ին արդեն քննադատում են սեփական կուսակիցները,  Շարմազանովը պատասխանեց. «ՀՀԿ-ն է այն կուսակցությունը, այն ուժը, որը կարող է լուծել երկրում առկա խնդիրները: Մեր տարածքային ընտրակարգով առաջադրված թեկնածուների նպատակը պետք  լինի առավել ձայներ բերել կուսակցությանը: Կարծում եմ՝ յուրաքանչյուր թեկնածուի  համար պետք է պատիվ լինի լինել ՀՀԿ-ի անդամ լինելը»:

Էդուարդ Շարմազանովը մի քանի անգամ կրկնեց, որ ՀՀԿ-ն է միակ ֆավորիտն այս ընտրապայքարում: Շարմազանովը հերթական անգամ իր համար պատիվ համարեց «Հանրապետական» կուսակության անդամ լինելը: 

ԼՈւՐԵՐ.com-ի հարցին, արդյոք վերջինս տեղյա՞կ է՝ հասարակության քանի տոկոսն է կիսում իր տեսակետը՝ ՀՀԿ-ին ֆավորիտ համարելով, պատգամավորը պատասխանեց. «Չեմ կարող ասել: Ես չեմ ուզում խլել սոցիոլոգների դափնիները: Ապրիլի երկուսից հետո կտեսնենք»:

Հիշեցնենք՝ երեկ ԱԺ-ում ՀՀԿ պատգամավոր Կարեն Կարապետյանը լրագրողների հետ զրույցում ասաց,  որ եթե ինքը «Հանրապետական» կուսակցության անդամ չլիներ և առաջադրվեր որպես պետական գործիչ, իր ռեյտինգն ավելի բարձր կլիներ՝ միաժամանակ ընդունելով, որ ՀՀԿ-ն ունի անկում ապրող վարկանիշ: 

Աղավնի Սուքիասյան