Աշխարհում ամենահայտնի Waldorf Astoria հյուրանոցը փակվել է երեք տարով

Նյու Յորքում գտնվող Waldorf Astoria հյուրանոցը, որը ամենահայտնի հյուրանոցն է համարվում աշխարհում, վերակառուցման համար փակել են երեք տարով: Ինչպես հաղորդվում է Hilton ցանցի կայքում, որի մեջ է մտնում այդ հյուրանոցը, փետրվարի 28-ից այն այլեւս կենվորներ չի ընդունում:

Վերակառուցման աշխատանքները ղեկավարելու է Պիեռ-Իվ Ռոշոնը, որն ավելի վաղ աշխատել է Փարիզի Le Bristol հյուրանոցի եւ հայտնի այլ հյուրանոցների վերակառուցման վրա:

Ինչպես ճշտում է CPP-Luxury-ն, ապագայում հյուրանոցի 1,4 հազար համարների մեծամասնությունը կվերածվի առանձին հարկաբաժինների: Պլանավորվում է, որ վերակառուցումից հետո որպես հյուրանոցային համարներ կօգտագործվի միայն 300-ից մինչեւ 500 սենյակ:

2014 թվականից Waldorf Astoria-ի սեփականատերը Anbang Insurance Group չինական ապահովագրական ընկերությունն է: Ապագայում հյուրանոցը կշարունակի կառավարել Hilton ցանցը:

Waldorf Astoria-ի ժամանակակից շենքը բացվել է 1931 թվականին, սակայն հյուրանոցի պատմությունն սկսվել է դեռ 19-րդ դարի վերջին (այն ժամանակ այն տեղաբաշխված էր հարեւանությամբ): Հյուրանոցում նրա գոյության տարիներին իջեւանել են բազմաթիվ հայտնի կենվորներ: Նրանց թվում են՝ Մեծ Բրիտանիայի Եղիսաբեթ Երկրորդ թագուհին, Հռոմի Պողոս Վեցերորդ պապը, ԱՄՆ-ի նախագահ Հերբերթ Հուվերը եւ ուրիշներ: Երգիչ Ֆրենք Սինատրան Waldorf Astoria-ում ապրել է մի քանի տարի:

Հյուրանոցում նկարահանվել են բազմաթիվ հոլիվուդյան ֆիլմեր, որոնց թվում են՝ «Ինտուիցիա», «Ուղեւորություն Ամերիկա» եւ «Կնոջ բույրը» կինոնկարները: Այն ներառված է աշխարհի լավագույն հյուրանոցների բազմաթիվ վարկանիշներում: