Կալանավորվել են ՊԲ N զորամասի հրամանատարի տեղակալը և պարենային ծառայության պետը (լրացված)

ՊԲ N զորամասի հրամանատարի տեղակալը և պարենային ծառայության պետը կալանավորվել են: Այս մասին ԼՈւՐԵՐ.com-ի թղթակցին տեղեկացրին ՀՀ Քննչական կոմիտեից:

ՊԲ N զորամասի հրամանատարի թիկունքի գծով տեղակալ Վ. Պետրոսյանին և պարենային ծառայության պետ Է. Ալեքսանյանին մեղադրանք է առաջադրվել ՀՀ քրեական օրենսգրքի 375-րդ հոդվածի 3-րդ մասով:

Նրանք կալանավորվել են պաշտոնեական դիրքը չարաշահելու և պետությանը նյութական վնաս պատճառելու մեղադրանքով:

Դատարանը բավարարել է քննիչի միջնորդությունը՝ նրանց նկատմամբ որպես խափանման միջոց կալանավորումն ընտրելու վերաբերյալ:

ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնի տարածած հաղորդագրության համաձայն՝ ՀՀ քննչական կոմիտեի երկրորդ կայազորային քննչական բաժնում քննվող քրեական գործով մեղադրանք է առաջադրվել N զորամասի հրամանատարի թիկունքի գծով տեղակալին և պարենային ծառայության պետին՝ շահադիտական նպատակներով պաշտոնեական դիրքը չարաշահելու և պետությանը նյութական վնաս պատճառելու համար։

Թիվ N զորամասում հացի պակասուրդ հայտնաբերելու դեպքի առթիվ հարուցված քրեական գործով երկրորդ կայազորային քննչական բաժնում իրականացվել են մեծածավալ քննչական գործողություններ՝ բազմակողմանի, օբյեկտիվ և լրիվ հետազոտումն ապահովելու ուղղությամբ, էական նշանակություն ունեցող հանգամանքները պարզելու համար նշանակվել ստուգումներ, դատահաշվապահական փորձաքննություններ, կատարվել գույքագրում։

Նախնական քննությամբ բավարար փաստական տվյալներ են ձեռք բերվել առ այն, որ ՊԲ N զորամասին մատակարարված հացի իրական քանակը չի համապատասխանել հաշիվ-ապրանքագրերով ներկայացված տվյալներին. դրանցում ներառվել են կեղծ տվյալներ՝ մատակարարված հացի քանակը ներկայացնելով ավելի շատ։

Ձեռք բերված ապացույցների համաձայն՝ N զորամասի հրամանատարի տեղակալ, կոչումով փոխգնդապետ Վ.Պետրոսյանը, ստորագրված պայմանագրերի հիման վրա N զորամասին հաց մատակարարող ՍՊԸ-ի պատասխանատու աշխատողների հետ պայմանավորվածություն է ձեռք բերել՝ անձնակազմի համար անհրաժեշտ փաստացի մատակարարված հացի քանակը փաստաթղթով ներկայացնել ավել և գրանցված յուրաքանչյուր N քանակի դիմաց ստանալ համապատասխան գումար։ Փոխգնդապետը, պարտավոր լինելով կազմակերպել և վերահսկել զորամասում ստացված հացի սահմանված հաշվառման ու հաշվետվության կարգը, շահադիտական նկատառումներով հանձնարարել է նույն զորամասի պարենային ծառայության պետ, մայոր Է.Ալեքսանյանին ՍՊԸ ուղարկել արդեն իսկ զորամաս մատակարարված հացի վերաբերյալ ապրանքագրեր, որոնք վերադարձվել են մատակարարված հացի քանակն ավել ներկայացված կեղծ գրառումներով։ Վերադաս հրամանատարությանը ներկայացվել են զորամասում ըստ կաթսայական բավարարման համար անհրաժեշտ քանակից ավելի շատ հաց մատակարարվելու մասին, որի արդյունքում պետությանը պատճառվել է նյութական ծանր վնաս։

Ձեռք բերված բավարար ապացույցների հիման վրա՝ Վ.Պետրոսյանին և Է.Ալեքսանյանին մեղադրանք է առջադրվել ՀՀ քրեական օրենսգրքի 375-րդ հոդվածի 3-րդ մասով, նրանց նկատմամբ որպես խափանման միջոց է կիրառվել կալանավորումը: ՍՊԸ-ի աշխատակցին մեղադրանք է առաջադրվել այսօր՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն՝ չհեռանալու մասին։

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորություննապացուցված չէ ՀՀ քրեական դատավարության օրենսգրքով սահմանված կարգով' դատարանի' օրինական ուժի մեջ մտած դատավճռով:

Սոնա Հարությունյան