Մետրոպոլիտեն-թանգարանի տնօրեն Թոմաս Քեմփբելը թողնում է պաշտոնը

Աշխարհի խոշորագույն գեղարվեստական թանգարաններից մեկի՝ Նյու Յորքի Մետրոպոլիտեն-թանգարանի գլխավոր տնօրեն եւ վարչության նախագահ Թոմաս Քեմփբելը մտադիր է թողնել պաշտոնը: Փետրվարի 28-ին արված հայտարարության մեջ նա հայտնել է, որ մտադիր է պաշտոնաթող լինել ընթացիկ տարվա հունիսի 30-ին. որոշման պատճառը հայտնի չէ:

Տնօրենի պարտականությունները ժամանակավորապես կկատարի Մետրոպոլիտեն-թանգարանի նախագահ Դենիել Վայսը:
Քեմփբելը դարձել է Մետրոպոլիտեն-թանգարանի իններորդ տնօրենը՝ այդ պաշտոնում աշխատելով ութ տարի: Մինչ այդ նա 14 տարի ղեկավարել է եվրոպական քանդակագործական արվեստի դեպարտամենտը:

Տնօրենի պաշտոնում Քեմփբելի աշխատանքի ժամանակաշրջանում թանգարանի հաճախելիությունն ավելացել է 40 տոկոսով՝ մեկ տարում հասնելով տարեկան 7 միլիոնի ռեկորդային ցուցանիշին: Բացի այդ, ստեղծվել է հատուկ թվային դեպարտամենտ, որի շնորհիվ թանգարանի հավաքածուն այժմ կարելի է դիտել ինտերնետ-կայքերի եւ սոցիալական ցանցերի միջոցով: Թանգարանի MetMuseum.org պաշտոնական կայքի այցելուների թվաքանակն արդեն հասել է տարեկան 30 մլն օգտատերերի, եւս տասնյակ միլիոնավոր մարդիկ թանգարան են «այցելում» սոցիալական ցանցերում:

Քեմփբելը նաեւ գործարկել է երկու նոր շինարարական նախագիծ, այդ թվում՝ կառուցվել է թանգարանի նոր մասնաշենքը, որը նվիրված է ամերիկյան արվեստին: «Ես շատ եմ հպարտանում թանգարանի ձեռքբերումներով, որոնց հասել ենք տնօրենի պաշտոնում իմ աշխատելու շրջանում,-ասել է Քեմփբելը:-Այժմ, երբ մշակույթն ու արվեստը հատուկ դեր ունեն հասարակության մեջ փոխըմբռնման առաջմղման գործում, ես գոհունակությամբ հայտարարում եմ, որ մեր թանգարանի հավաքածուները դարձել են ամենաընդգրկունն ու ամենաբազմազանը նրա գոյության ողջ պատմության ընթացքում»:

2020 թվականին թանգարանը նշելու է իր հիմնադրման 150-ամյակը: Մշտական հավաքածուում այժմ ներառված են արվեստի մոտավորապես 2 մլն ստեղծագործություններ, հաղորդել է ՏԱՍՍ գործակալությունը: