ՀՀԿ նախընտրական խոստումներ V.S. իրականություն

«Առա՛ջ, Հայաստան», «Հավատանք, որ փոխենք», «Դեպի ապահով Հայաստան», «Անվտանգություն և առաջընթաց»․ սրանք այն չորս նախընտրական կարգախոսներն են, որոնցով 2008 թվականից մինչև 2017-ը իշխող Հանրապետականը ներկայացել է հանրությանը: 2008-ի ընտրություններում ՀՀԿ-ն հանդես եկավ «Առա՛ջ, Հայաստան» կարգախոսով՝ խոստանալով «Հայաստանում վերջնականապես հաղթահարել գործազրկությունն ու աղքատությունը, օր առաջ բարելավել մարդու կյանքը, իսկ երկիրը դարձնել ավելի անվտանգ»: 2012-ի խորհրդարանական ընտրություններում ՀՀԿ-ն արդեն առաջարկում էր «հավատալ, որ փոխեն»՝ ընդգծելով, թե հավատալով՝ հնարավոր է երկրում ամրատական փոփոխությունների հասնել: 2017-ի խորհրդարանական ընտրություններին Սերժ Սարգսյանի ղեկավարած «Հանրապետական»-ը որդեգրել է «Անվտանգություն և առաջընթաց» կարգախոսը:

2012թ. ընտրություններին ՀՀԿ-ն մասնակցեց «Հավատանք, որ փոխենք» կարգախոսով՝ ներկայացնելով ծավալուն ծրագիր: Միայն թե այդ ծրագրում խոստումները շատ ընդհանրական էին եւ թվային արտահայտությամբ՝ կոնկրետ արդյունքների մասին խոսք չկար: Պատճառն էլ պարզ էր. նախորդ խորհրդարանական ու նախագահական ընտրություններում ՀՀԿ-ն կոնկրետ արդյունքներ էր խոստացել, բայց այդպես էլ չէր կարողացել ապահովել, ու այդ ողջ ընթացքում՝ ընդդիմությունը, հասարակությունը ՀՀԿ-ին ամեն հարմար առիթով հիշեցնում էր այդ խոստումները: ՀՀԿ-ն այս տարիների ընթացքում չի կատարել նաեւ 2012թ.-ին տված իր նախընտրական ծրագրի դրույթները:

Ընտրություններից մեկ ամիս անց կուսակցության ձևավորած կառավարության վարչապետ Տիգրան Սարգսյանը ներկայացրեց ծրագիրը, որն, ինչպես ենթադրվում էր, պիտի դառնար երկրի զարգացման փաստաթուղթը 2013- 2017 թվականներին: Իսկ այժմ տեսնենք, թե այդ ծրագրից որ կետերն են իրականություն դարձել:

ՀՆԱ-ի տարեկան աճ՝ 5-7%-ի չափով:

Եթե 2013-16 թվականներին ՀՀ տնտեսությունն աճեր ՀՀԿ-ի խոստացած՝ նվազագույնը՝ 5%-ով, 2016-ի համախառն ներքին ծավալը կավելանար 2012-ի համեմատ՝ 21.5%-ով: Խոստացված առավելագույն 7%-անոց աճի դեպքում՝ 2016-ի ավարտին հայկական տնտեսությունը կգերազանցեր 2012-ի ցուցանիշը՝ 29.5%-ով: Փոխարենը՝ 2013-2016 թվականներին տնտեսական աճը կազմել է համապատասխանաբար 3.5%, 3.4%, 3% և 0.5% (2016-ի տվյալները նախնական են):

Այսպիսով, ՀՀ տնտեսությունը 4 տարում աճել է 10.8%-ով: Դա մոտ 2 անգամ պակաս է ՀՀԿ խոստացած աճի վատագույն ծավալներից ու մոտ 2.7 ագնամ պակաս՝ առավել լավատեսական կանխատեսումից: Համեմատելով «հօգուտ» ՀՀԿ-ի՝ խոստացած նվազագույն աճի տեմպերի հետ, կարելի է եզրակացնել, որ իշխող կուսակցությունը տնտեսական աճի խոստումը կատարվել է ընդամենը 50%-ով:

Նվազագույն աշխատավարձը պիտի կազմի աղքատության գծի առնվազն 140%-ը, միջին թոշակը՝ 125%-ը:

Աղքատության վերին գիծը Հայաստանում 2015-ին կազմել է 41.698 դրամ, միջին աշխատավարձը՝ 55.000 դրամ կամ աղքատության վերին գծի 132%-ը: Պայմանական շեմը հաղթահարելու համար կպահանջվեր սահմանել 58.377 դրամ նվազագույն աշխատավարձ:

Առնվազն 100.000 նոր աշխատատեղ ՀՀ-ում. գործազուրկների թիվն, ըստ ԱՎԾ-ի, 2012 թվականի երկրորդ եռամսյակին գրանցված 247.400-ից նվազել է մինչև 226.600՝ 2016-ի երկրորդ եռամսյակում կրճատվելով 21.000-ով:

Ըստ պաշտոնական տվյալների, Հայաստանից 9 տարիների ընթացքում հեռացել է 355 հազար մարդ: Դա նշանակում է, որ Հայաստանի բնակչությունը Հանրապետականի իշխանության այս տարիներին պակասել է մոտ 12-13 տոկոսով, աղքատությունը աճել է մոտ 10 տոկոսով: Ահա նախընտրական խոստումների այսպիսի կատարողականով է ՀՀԿ-ն մոտենում գալիք խորհրդարանական ընտրություններին և դա այն դեպքում երբ ՀՀԿ-ն միակ կուսակցությունն է, որն ունեցել է բոլոր հնարավորությունները՝ նախընտրական խոստումները կատարելու համար…

Ստելլա ԽԱՉԱՏՐՅԱՆ