Հայաստանում մեկնարկող ֆրանկոֆոնիայի օրերի կապակցությամբ Ֆրանսիայի դեսպանատունը կազմակերպել էր ընդունելություն

Մարտի 20-ին աշխարհի ֆրանկոֆոն համայնքը նշում է Ֆրանկոֆոնիայի միջազգային օրը: Ֆրանկոֆոնիայի օրերի մեկնարկի և «Ֆրանսիայի համը» միջոցառման կապակցությամբ Ֆրանսիայի դեսպանատունը կազմակերպել էր ընդունելություն: Հրավիրվածների շարքում էին դեսպաններ, քաղաքական եւ մշակութային գործիչներ եւ այլն:

Ժան-Ֆրանսուա Շարպանտիեն իր ելույթում կարեւորեց Հայաստանում ֆրանկոֆոնիային նվիրված տոնակատարությունների անցկացումը, որոնք նրա խոսքով՝ դարձել են բարի ավանդույթ:

«Արդեն մի քանի տարի է՝ Հայաստանում տոնվում է Ֆրանկոֆոնիայի օրը: Հայաստանը ակտիվություն է ցուցաբերում մանավանդ 2012 թվականից հետո, երբ ճանաչվեց Ֆրանկոֆոնիայի միջազգային կազմակերպության լիիրավ անդամ: Միջոցառումների կազմակերպման հարցում համագործակցում ենք մի շարք հայաստանյան գործընկերների, Հայաստանում հավատարմագրված դիվանագիտական ներկայացուցչությունների հետ՝ Կանադա, Շվեյցարիա, Հունաստան, Լիտվա եւ Լիբանան»,-ասաց դեսպանը:

Ֆրանկոֆոնիայի միջազգային օրվա կապակցությամբ Հայաստանում Ֆրանսիայի դեսպանատունը մարտի 15-ից 30-ը կազմակերպում է Ֆրանկոֆոնիայի 15 օրերը տոնական միջոցառումների շարքը: 15 օրերի ընթացքում անցկացվելիք միջոցառումներն անդրադառնալու են տարբեր ոլորտներին՝ կինո, հրատարակչություն, էկոնոմիկա եւ այլն: Այս տարվա կենտրոնական թեմա է ընտրվել նորագույն եւ թվային տեխնոլոգիաները, որին նվիրված է լինելու միջոցառումներից 5-ը՝ էլ-համբավին նվիրված համաժողով, համացանցի բառապաշարի վերաբերյալ ֆրանսերեն լեզվի մրցույթ, սմարթֆոնների համերգ եւ այլն:

2017 թ. Ֆրանկոֆոնիայի 15 օրերի եւս մեկ առանձնահատկությունն է Ռուսաստանում Կանադայի դեսպանության հետ համատեղ կազմակերպված ֆրանկոֆոն ֆիլմերի փառատոնը, որն անցկացվելու է մարտի 20-26-ը՝ ներառելով բազմաժանր ֆիլմեր, կատակերգություններ, վավերագրական ֆիլմեր եւ այլն:

Մարտի 21-ին Gout de France միջոցառմանը 5 մայրցամաքներից շուրջ 2000 ավագ խորհարարներ կներկայացնեն ֆրանսիական գաստրոնոմիան: Միջոցառմանը կմասնակցի Երեւանի 6 ռեստորան, որոնք ընդունելության ընթացքում ներկայացրին իրենց կողմից պատրաստված ուտեստներ: Հատկապես այս տարի միջոցառման շրջանակում ռեստորանային գործի մասնագետներ պատրաստող երկու՝ Երեւանի ֆրանս-հայկական եւ Գյումրու Տիրամայր Հայաստանի մասնագիտական վարժարանները կօգնեն դեսպանատան ավագ խոհարարին ճաշեր եւ կոկտեյլներ պատրաստելու գործում: