Մինչև քարոզարշավի վերջը շատ բան կփոխվի. պատգամավոր

Ինչքան մոտենում է խորհրդարանական ընտրությունների օր նշանակված ապրիլի 2-ն, այնքան պարզորոշ է դառնում, թե որ քաղաքական ուժն ինչ հնարավորություն ունի, բացի այդ՝ ինչքան մոտենում է վերոնշյալ օրն, այդքան կրքերը թեժանում են, մրցակցությունը խորանում, բանը հասնում է անգամ կրակոցների: 

Նախընտրական շրջանում ստեղծված նման իրավիճակը ՀՀԿ պատգամավոր Լեռնիկ Ալեքսանյանի համար նորմալ մրցապայքար է: ԼՈւՐԵՐ.com-ի թղթակցի հետ զրույցում ՀՀԿ պատգամավորը, խոսելով քաղաքական ուժերի միջև ընթացող պայքարի և մրցակցության մասին, ասաց, որ  քարոզարշավն ընթանում է բնական հունով և շահագրգռվածություն նկատելի է բոլոր ուժերի մոտ. «Մեկ բառով բնութագրելիս՝ կարող եմ ասել՝ ակտիվություն կա քաղաքական բոլոր ուժերի կողմից»:

Նա բնական համարեց մրցակցությունը տարբեր ուժերի միջև՝ շեշտելով. «Ի՞նչ ընտրություններ, որտեղ մրցակցություն չլինի»:

Իսկ արդյո՞ք կարելի է համարել քարոզարշավի ընթացքը բնական հունով ընթացող այն դեպքում, երբ, օրինակ, երեկ՝ Ջրառատում հրաձգություն տեղի ունեցավ ՝ Լեռնիկ Ալեքսանյանը նշեց, որ այն, ինչ կապված է քրեական գործերի հետ, պետք է մանրամասն ուսումնասիրել, այնուհետև որևէ մեկնաբանություն տալ. «Քանի որ լավ չեմ տիրապետում ինֆորմացիային և ամբողջությամբ չգիտեմ բուն էությունը, կդժվարանամ գնահատականներ տալ: Մամուլում տարբեր ինֆորմացիաներ կան, սակայն ես դրա հիման վրա չեմ կարող ոչինչ ասել, քանի որ մանրամասների չեմ տիրապետում»:

Խոսելով կուսակցությունների և դաշինքների՝ խորհրդարան մտնելու հնարավորությունների մասին, պատգամավորը նշեց, որ քարոզարշավն ընթանում է և յուրաքանչյուր ուժն իր կողմնակիցներն ունի, սակայն դժվարացավ գնահատականներ տալ որևէ քաղաքական ուժի վերաբերյալ:

Ժամանակին խոսվում էր ՕՐՕ-ի՝ նվազագույն շեմը չհաղթահարելու մասին, սակայն իրադարձությունների բերումով՝ այսօր նրանք ուշադրության կենտրոնում են հայտնվել: Հարցին՝ ինչպե՞ս կգնահատի «Օհանյան-Րաֆֆի-Օսկանյան» դաշինքի խորհրդարան մտնելու շանսերը ստեղծված իրավիճակում, մեր զրուցակիցը պատասխանեց. «Դեռ ժամանակ կա: ՕՐՕ դաշինքի վերաբերյալ սոցհարցումներին այնքան էլ չեմ հավատում, բայց, այնուամենայնիվ, պնդում եմ, որ պետք է սպասենք ընտրությունների արդյունքներին, իսկ մինչև քարոզարշավի վերջը շատ բան կփոխվի»: