Նյութեր են նախապատրաստվում Գյումրու «Սուրբ Ամենափրկիչ» եկեղեցու սրբապատկերների վնասման առնչությամբ

Շիրակի մարզի դատախազությունում նյութեր են նախապատրաստվում Գյումրու «Սուրբ Ամենափրկիչ» եկեղեցու սրբապատկերների վնասման փաստի վերաբերյալ: Այս մասին տեղեկացրեց Շիրակի մարզի դատախազ Կարեն Գաբրիելյանը: «Այս պահին նյութեր են նախապատրաստվում, այլ բան դեռ վաղ է ասել»,-նշեց Կարեն Գաբրիելյանը:
Մարտի 24-ին նկարիչ Տիգրան Հակոբյանն առավոտյան նկատել է, որ իր կողմից կատարված երեք սրբապատկերները՝ «Քրիստոսի հարությունը», «Հիսուսի մկրտությունը» և «Մեսրոպ Մաշտոց, Սահակ Պարթև» վնասված են: Հեղինակը լրատվամիջոցների հետ զրույցում այս քայլը դիտավորություն է որակել:

Ինչպես տեղեկացրեց Շիրակի թեմի առաջնորդ Միքայել եպիսկոպոս Աջապահյանը, նկարիչն այս նկարներն արել է ոչ թեմի առաջնորդի ցանկությամբ ու ցուցումով: «Ասում է արել է Վարդան Ղուկասյանի պատվերով, բայց ավելի հավակնում եմ այն փաստին, որ սեփական ցանկությամբ է արել»,-նշեց թեմակալ առաջնորդը՝ փաստելով, որ մուտքի պատի որմնանկարը ևս չի եղել իր ցանկությամբ, ավելին' որմնանկարի կատարման որակի ու ձևի անհամապատասխանության պատճառով այն մաքրվել է: «Հատուկ իմ ցանկությամբ և ճաշակով եկեղեցում որմնանկարներն արվել են Լևոն Զաքյան ի կողմից, որոնք ամեն ինչով համապատասխանում են եկեղեցու և՛ ճարտարապետությանը, և՛ կատարման որակն ու ձևն են նորմալ, իսկ Տիգրան Հակոբյանի արածն ընդունելի չէր»,-նշեց Միքայել սրբազանը՝ նկարների վնասման փաստը անհավասարակշիռ մարդու արարք որակելով:

Գյումրու խորհրդանիշներից մեկը համարվող՝ 1860-ականներին կառուցված, ավելի քան 36 մետր բարձրություն (առանց գմբեթի) ունեցող եկեղեցին, որի ճարտարապետը եղել է Թադևոս Անտիկյանը, խորհրդային տարիներին ծառայել է որպես ֆիլհարմոնիայի դահլիճ: Եկեղեցին կառուցվել է «Անի»-ի մայր տաճարի օրինակով և ասում են, որ վարպետն ամեն անգամ քարը դնելիս ֆայտոնով գնացել է Անի և հետ է եկել ու շարունակել շինարարությունը՝ այսպես կառուցվել է եկեղեցին՝ քար առ քար: Որոշ աղբյուրների պնդմամբ՝ եկեղեցու շինարարության համար ծախսվել է 60 հազար ռուսական ոսկի, եղել են նաև հանգանակություններ, իսկ գյումրեցիներն աշխատել են անվարձահատույց: Եկեղեցու խաչը սկզբում եղել է փայտից: 1988 թվականին եկեղեցին մասամբ ավերվել էր: Եկեղեցու վերականգնման աշխատանքները մեկնարկեցին նախ հանգանակություններով, ապա ստեղծված «Ամենափրկիչ» հիմնադրամի կողմից՝ բարերարների միջոցներով՝ 1998 թվականին: Եկեղեցու վերականգնման աշխատանքներն իրականացվել են պահպանելով եկեղեցու նախկին ճարտարապետական տեսքը, օգտագործելով եկեղեցու հին քարերը, սակայն եկեղեցու ամրության համար ավելացվել են մետաղյա կոնստրուկցիաներ: 2002 թվականից վերականգնման աշխատանքների համար ֆինանսական հիմնական բեռն իր ուսերին էր վերցրել Գյումրու նախկին քաղաքապետ Վարդան Ղուկասյանն ու Ղուկասյանների ընտանիքը: Վերջիններիս միջոցներով ոչ միայն հիմնանորոգվեց եկեղեցին, այլ նաև խաչը: Ի դեպ, տեղադրված խաչով եկեղեցին ունի 47 մետր բարձրությամբ: Այս պահին իրականացվում են եկեղեցու ներքին հարդարման աշխատանքները: Եկեղեցու վրա արդեն տեղադրված է նաև փոքր զանգը, որն իր կողմից քաղաքին նվիրեց քանդակագործ Արտուշ Պապոյանը: Շատ գյումրեցիներ վստահ են, որ 1988 թվականի երկրաշարժից հետո &nbs p;Գյումրու վերականգնումը կազդարարվի հենց Ամենափրկչի վերականգնումով:

Արմենուհի Մխոյան