Մոսկվայում անհանգիստ գիշեր է սպասվում. ԱԻՆ-ը զգուշացնում է

ՌԴ արտակարգ իրավիճակների նախարարության գլխավոր վարչությունը զգուշացրել է մայրաքաղաք Մոսկվայում ուժեղ քամու և ձնախառն անձրեւի վտանգի մասին: ԼՈւՐԵՐ.com-ն այս մասին տեղեկացավ ՏԱՍՍ-ից:

Կենտրոնական վարչության տվյալներով՝ մարտի 26-ի ժամը 20:00-ից մինչեւ մարտի 27-ի ժամը 06:00-ը Մոսկվայում  տեղ-տեղ սպասվում է թաց ձյուն, մերկասառույց, քամու ուժգմնացում՝ մինչեւ 20 մ/վրկ արագություն:

Անբարենպաստ եղանակի պատճառով հնարավոր է՝ վնասվեն էլեկտրալարեր, գովազդային վահանակներ, ծառեր, ինչը կարող է խաթարել ճանապարհային երթեւեկությունը: 

ԱԻՆ-ից նախազգուշացնում են շրջանցել գովազդային վահանակները, ավտոմեքենաները կայանել ավտոտնակներում կամ ծառերից ու թույլ ամրացված կառույցներից հեռու:  

Եղանակային պայմանների պատճառով հնարավոր է ցածր տեսանելիություն, մերկասառույցի պատճառով՝ տեղաշարժման դժվարություններ: Փրկարար ծառայությունից վարորդներին խորհուրդ են տալիս պահպանել սահմանված հեռավորությունն ու չգերազանցել արագությունը: