«Ով էլ որ չի ընտրվել՝ իրանց էլ համբերություն». Նովո

Արմավիրի մարզն ընդգրկող թիվ 6 ընտրատարածքում խորհրդարանական ընտրություններին ՀՀԿ-ի հիմնական թեկնածուներն էին՝ ԱԺ պատգամավոր, գեներալ-մայոր Սեյրան Սարոյանը, ՀՀԿ, ԱԺ պատգամավոր, ՀՀԿ խորհրդի անդամ Հրանտ Գրիգորյանը, ԱԺ պատգամավոր, ՀՀԿ խորհրդի անդամ Նահապետ Գևորգյանը և ԱԺ պատգամավոր, ՀՀԿ խորհրդի անդամ Առաքել Մովսիսյանը:

Ամենամեծ թվով ձայները, ըստ նախնական տվյալների, հավաքել է ՀՀԿ-ից Սեդրակ Սարոյանը՝ 21933 ձայն, գրեթե հավասար ձայներով նրան հաջորդում է Նահապետ Գևորգյանը (Նովո)՝ 21778 ձայն, Ալեքսան Պետրոսյանը ստացել է 9416 ձայն, Առաքել Մովսիսյանը՝ 6716 ձայն:

ԼՈւՐԵՐ.com-ի թղթակցի հետ զրույցում Նահապետ Գևորգյանը, ով առավել հայտնի է Նովո մականվամբ, այսպես մեկնաբանեց խորհրադարանական ընտրությունների քվեարկության արդյունքները: «Այսինքն, ի՞նչ կա մեկնաբանելու. մարդը պետք ա ինքը ճիշտ ապրի, ժողովրդի մեջ հարգանք վայելի, ոչ թե էս 20 օրով կամ 3 ամսով նոր իրան ճանաչեն, այլ ընդհանուր առմամբ մարդկանց հետ պետք ա շփվի, ժողովուրդը պետք ա իրան ընդունի իրա արած գործով ու իրա ապրած կյանքով: Թե չէ՝ ընտրությունից ընտրություն որ հիշեն՝ շատ վատ կլինի»,- ասաց նա:

Հարցին՝ ի՞նչ է կարծում, իր առջև դրված նշաձողը հաղթահարե՞լ է, Նահապետ Գևորգյանը պատասխանեց.

«Էդ հարցը կտաս Հանրապետական կուսակցությանը: Ռեյտինգային ընտրություն է, եթե ես մարզում ամենաբարձր ցուցանիշն եմ հավաքել, ինչի՞ մասին է խոսքը»:

Մեզ հետ զրույցում Նահապետ Գևորգյանը ուղերձ հղեց. «Առիթից օգտվելով, շնորհավորում եմ նրանց, ովքեր ընտրվել են ռեյտինգային կարգով և մաղթում եմ բոլորին առողջություն, բեղմնավոր աշխատանք, հաջողություններ: Խորհրդարան գալը մենակ դա չի, որ պետք ա ամբիոնից ելույթ ունենան, ժողովուրդը պետք ա իրանց ընդունի ու սիրի: Էդ ամպագոռգոռ խոսքերով և մնացած ճառերով ժողովրդին չես կարա օգնես: Էսօրվա ժողովուրդը առաջվա ժողովուրդը չի»,- նշեց նա՝ ևս մեկ անգամ շնորհավորելով ընտրվածներին:

Սոնա Հարությունյան