ԵԼՔ-ին վերահսկելի ընդդիմություն ասողը «գլուխը պատի՛ն է տալիս»

Խորհրդարանական ընտրություններին մասնակցած 9 քաղաքական ուժերից 4-ն ապրիլի 2-ին ստացան բավարար քվե և նոր գումարման խորհրդարանում ներկայացված լինելու հնարավորություն: Այս չորս ուժերից մեկն էլ ԵԼՔ դաշինքն է: Միայն այս դաշինքի խորհրդարան անցնելու փաստը հանրային տիրույթում քննադատվեց. երևի պատճառն այն էր, որ մարդիկ չէին սպասում դաշինքի կողմից անգամ նվազագույն շեմի հաղթահարումը: Քննադատություններն ու քննարկումները հասան անգամ այն եզրահանգման, որ ԵԼՔ-ին «նվիրել են» քվեները և նրանք վերահսկելի ընդդիմություն են:

ԵԼՔ դաշինքի ցուցակի առաջին եռյակում գտնվող Էդմոն Մարուքյանը զարմանում է` ովքե՞ր են իրենց քննադատողները, նա ոչ լսել է, ոչ էլ` տեսել, քննադատողներից միայն մեկին հիշեց. «Ես չեմ տեսել քննադատություններ և չգիտեմ՝ ով է քննադատել մեզ: Մեզ միշտ միայն Աշոտյանն է քննադատել, եթե էլի կան քննադատողներ, երևի Աշոտյանի հետ են եղել, չգիտեմ»:

Էդմոն Մարուքյանը բավականին զգացմունքային պատասխան տվեց մեր մյուս դիտարկմանը, թե` ԵԼՔ-ը վերահսկելի ընդդիմություն է. «Գիտե՛ք՝ ամեն տխմարություն կարող են ասել: Ես էլ ասում եմ, մենք վերահսկելի ընդդիմություն չենք, ով էլ այդպես է մտածում, գլուխը պատի՛ն է տալիս»,- խոսքը եզրափակեց Էդմոն Մարուքյանը:

Ապրիլի 2-ին կայացած 2017թ. ԱԺ ընտրությունների վերաբերյալ ԵԼՔ դաշինքն իր կարծիքն արդեն իսկ հայտարարել է, որը կարող եք կարդալ, անցնելով այս հղումով:

Նշենք, որ ԵԼՔ դաշինքի օգտին քվեարկել է 122 հազար 49 քաղաքացի (ընտրությանը մասնակցածների 8,56%-ը):

Սոնա Հարությունյան