«Փաստ». ՕՐՕ–ն դուրս չի գա փողոց

«Փաստ» օրաթերթը գրում է.

«Չնայած ընտրություններում ստացած փոքր ձայներին ու հայտարարությանը, թե «ապրիլի 2–ին տեղի ունեցած խորհրդարանական ընտրություններով Հայաստանը ևս մեկ մեծ հետքայլ արձանագրեց, և սա ոչ թե ընտրություն էր, այլ ձայների առևտուր և իշխանությունների կողմից կազմակերպված համակարգային կեղծարարություն», ՕՐՕ–ն դուրս չի գա փողոց ու իր համակիրների հետ չի գնա փողոցային պայքարի:

Երեկ կայացել է ՕՐՕ–ի հետընտրական ժողովը, որի ընթացքում ՕՐՕ–ի ղեկավարները՝ Սեյրան Օհանյանը, Րաֆֆի Հովհաննիսյանն ու Վարդան Օսկանյանը ներկաներին բացատրել են, որ այս պահին փողոցային պայքարի իմաստ չկա: Ասել է թե՝ հետընտրական պայքար չի լինի, ՕՐՕ–ն փողոց դուրս չի գա: Հավաքի ժամանակ հնչել է նաև կարծիք, թե «մարդիկ իրենց ձայնը ծախել են իշխանությանը, ի՞նչ պայքարենք»:

Մինչդեռ նախօրեի հայտարարության մեջ ՕՐՕ–ն հայտարարել է. «Փոփոխություններն անխուսափելի են, և մենք լինելու ենք այդ փոփոխություններին տանող գործընթացների առաջին շարքերում»:
Իրականում չի բացառվում, որ ՕՐՕ–ն փողոցային պայքարի չգնալու այլ պատճառ ունի. թերևս ՕՐՕ–ում վախենում են քիչ մարդ հավաքել հրապարակում ու, այսպես ասած, խայտառակ լինել: Մեկ–երկու սակավաթիվ ու մարող հավաք, և ՕՐՕ–ն արագ կսպառի Սերժ Սարգսյանի իշխանությանը միակ արմատական ընդդիմադիրի իր դերը: Իսկ այլ դերակատարություն այս պահին դաշինքը չի կարող ստանձնել:

Միևնույն ժամանակ «Փաստին» հասած տեղեկություններով, ՕՐՕ–ի ղեկավարներն ասել են, որ դաշինքը չի առանձնանա, կշարունակի համատեղ պայքարը և որ այժմ դաշինքի հիմնական խնդիրը ընդդիմությունը կոնսոլիդացնելն է ու ներսից ուժեղանալը:
Այս դեպքում ևս խնդիր կա. Հետընտրական շրջանում ՕՐՕ–ն որևէ նոր ուժի չի կարող կոնսոլիդացնել: Դա անգամ նախընտրական շրջանում չստացվեց. ՀԱԿ–ը չի միանա ՕՐՕ–ին, արևմտամետ «Ազատ դեմոկրատները»՝ նույնպես, դժվար է պատկերացնել «Ելք»–ի հետ առնչությունը, «Ծառուկյան» դաշինքը ևս դժվար թե համագործակցի, «Հայկական վերածնունդը», հայտարարել է, որ չի բողոքարկելու ընտրոթյունների արդյունքները: Ուրեմն ո՞ւմ հետ է միանալու ու ում է կոնսոլիդացնելու ՕՐՕ–ն. թերևս միայն սեփական ուժերը:

ՕՐՕ դաշինքին միացած ազատամարտիկ Սմբատ Հակոբյանը երեկ չհամաձայնեց, որ իշխանությանը ձեռնտու է հետընտրական պայքարի չգնալու՝ ՕՐՕ–ի որոշումը: «Իշխանության հետ համագործակցելու եզրեր չենք տեսել, չենք էլ տեսնում: Ես էն մարդն եմ, որ տեսնեմ հետընտրական զարգացումների անհրաժեշտությունը կա, առաջին կոչ անողը ես կլինեմ, բայց ես գտնում եմ, որ հիմա դրա անհրաժեշտությունը չկա»,– ասաց ազատամարտիկ Սմբատ Հակոբյանը՝ շարունակելով. «Մենք պատրաստ չենք դրան, պետք է ժողովրդին նախապատրաստել՝ 1 տարի, 6 ամիս, նախապատրաստել արտահերթ ընտրությունների: Էս պահին մենք ավելի շատ ներսում կազմակերպական խնդիրներ ունենք: Պետք է էս դաշինքը մեծացվի, ընդդիմադիր դաշտում լինենք, պետք է կոնսոլիդացվեն: Այսօրվա քննարկման ժամանակ էլ մեզանից որևէ մեկը չտեսավ փողոց դուրս գալու անհրաժեշտությունը:

Հետընտրական զարգացումների անհրաժետություն չկա: Այսօր պետք է ներքին թիմն ուժեղացնել»:
Դաշինքի անդամ ազատամարտիկը չի բացառում, որ ՕՐՕ–ի հիմքի վրա կարող է նոր կուսակցություն ստեղծվել: Վերջինս չհամաձայնեց դիտարկմանը, թե ՕՐՕ միավորումը չընկալվեց հանրության կողմից. «Չէ, ես էդ կարծիքին չեմ, հանրության հիմնական խնդիրն էր, որ ընդհանուր ընդդիմադիր դաշտը չմիավորվեց, չուզեց: Հիմա հանրությունը տեսնում է՝ իրականում ովքեր էին ընդդիմադիր, ովքեր ընդդիմադիր չէին: Բացի ՕՐՕ դաշինքից, մնացած բոլորին կարող եմ ասել. համ ժողովրդին քցեցին, համ իրանք իրանց, որ չմիավորվեցին, դաշինք չկազմեցին ու գնացին պրոպետական ուժերի հետ նախնական պայմանավորվածություններ ձեռք բերեցին ինչ–որ տոկոսների, խոստումների դիմաց, բայց ինչ–որ խոստացել էին, ոչ մի բան չստացվեց: Խոսքը ոչ միան ՀԱԿ–ի և «Ազատ դեմոկրատների» մասին է: Իսկ «Ելք»–ի դեպքում նաև ինչ–որ համաձայնություն կա իշխանության հետ: Էդպես չի, որ «Ելք»–ն ավելի շատ հեղինակություն ա վայելում ժողովրդի մոտ, քան ՕՐՕ դաշինքը կամ ՀԱԿ–ը»»:

Շարունակությունը' «Փաստ» օրաթերթի այսօրվա համարում: