2016 թվականի ընթացքում գրանցվել է զինծառայողների ինքնավնասման 137 դեպք

ՀՀ պաշտպանության նախարարության կողմից ներկայացված տվյալների համաձայն՝ 2016 թվականի ընթացքում գրանցվել է 139 զինծառայողի մահվան ելքով դեպք։ Ընդ որում, մարտական պայմաններում կորուստները կազմել են 84 զինծառայող, իսկ ոչ մարտական պայմաններում՝ 55։ Այս մասին ԼՈւՐԵՐ.com-ը տեղեկանում է Մարդու իրավունքների պաշտպան Արման Թաթոյանի ներկայացրած տարեկան ծավալուն հաղորդումից: 

Նշված դեպքերը տեղի են ունեցել հակառակորդի հարձակողական և դիվերսիոն հետախուզական խմբերի գործողությունների կասեցման, դիպուկահարների կողմից արձակված կրակոցների, մարտական հերթապահության կրման և զինվորական ծառայության անվտանգության ապահովման, ինչպես նաև զինծառայողների փոխհարաբերությունների կանոնագրքային կանոնների խախտումների, հիվանդությունների, ճանապարհատրանսպորտային ու դժբախտ պատահարների հետևանքով։

Ըստ նույն աղբյուրի՝ ՀՀ պաշտպանության նախարարության տվյալների համաձայն՝ 2016 թվականի ընթացքում գրանցվել է ժամկետային պարտադիր զինծառայողների կողմից ինքնավնասման 137 դեպք, որոնցից շուրջ 85%-ը կատարվել են զինվորական ծառայության պարտականությունների իրականացման հետ կապված հանգամանքներում։

Արձանագրված ինքնավնասման դեպքերը պետք է դառնան դրանց պատճառների և նպաստող պայմանների խորը ուսումնասիրության ու համապատասխան կանխարգելիչ միջոցառումներ ձեռնարկելու հիմնարար առիթ, իր հաղորդման մեջ փաստել է Թաթոյանը: 

ՀՀ պաշտպանության նախարարության կողմից ներկայացված տեղեկությունների համաձայն՝ մահացության դեպքերի առնչությամբ անցկացվել են ծառայողական քննություններ՝ պարզելու ծառայության կազմակերպման ու իրականացման ժամանակ տեղ գտած թերություններն ու բացթողումները: 

ՄԻՊ զեկույցում նաև ծավալուն անդրադարձ է կատարվել 5 հիմնական միջադեպերին, որոնք տեղի են ունեցել 2016 թվականի դեկտեմբերի 29-ին, 2017 թվականի հունվարի 3-ին, նույն թվականի հունվարի
8-ին և հունվարի 13-ին՝ հայ-ադրբեջանական պետական սահմանին: 

Փաստահավաք աշխատանքների արդյունքում պարզվել է, որ գնդակոծվել են պետական սահմանին հարակից և մոտ գտնվող բնակելի տները: Վաղ առավոտից, երբ սկսվել են գնդակոծությունները, խաղաղ բնակիչները ստիպված են եղել թաքնվել հատուկ թաքստոցներում և դուրս են եկել թաքստոցներից ցերեկը ժամը 13:00-ի սահմաններում: Փաստահավաք աշխատանքների ընթացքում արձանագրվել են նաև գյուղի խաղաղ բնակիչների, այդ թվում՝ երեխաների, կանանց ու տարեցների կյանքի համար ակնհայտորեն վտանգավոր գնդակոծությունների հետքեր:

2017 թվականի հունվարի 3-ին՝ ժամը 18:05-19:00-ի սահմաններում կրակոցներ են արձակվել նաև գյուղի դպրոցի և մանկապարտեզի ուղղությամբ: Ըստ Google Earth ծրագրի տվյալների՝ Չինարի գյուղի մանկապարտեզից մինչև պետական սահման տարածությունը կազմում է 1,74, իսկ դպրոցից մինչև պետական սահման՝ 2,36 կիլոմետր:

Ըստ Օմբուդսմանի՝ հարձակումները և գնդակոծությունները կատարվել են այնպիսի վայրերում, այնպիսի եղանակով և օրվա այնպիսի ժամերին, որն ակնհայտորեն վկայում է խաղաղ բնակիչներին վնաս հասցնելու ադրբեջանական զինված ուժերի մտադրության մասին:

Ներկայացրեց՝ Քրիստինա Աղալարյանը