Գոհ եմ. Արտակ Սարգսյան

Ապրիլի 2-ին կայացած խորհրդարանական ընտրություններին թիվ 2 ընտրատարածքում առաջադրված պատգամավորի ՀՀԿ-ական ռեյտինգային  թեկնածու Արտակ Սարգսյանն իրեն տրված 12.027 քվեներով հնարավորություն ստացավ շարունակել իր աշխատանքն արդեն 6-րդ գումարման Ազգային Ժողովում:

Արդյո՞ք պատգամավորի համար սպասելի էր ձայների այդ քանակն ու ի՞նչ կերպ է շնորհակալ լինելու իրեն օգտին քվե տված հայաստանցիներին, ԼՈւՐԵՐ.com-ը փորձեց պարզել հենց իրենից.

-Պարո՛ն Սարգսյան, գո՞հ եք խորհրդարանական ընտրություններում Ձեր արձանագած արդյունքից.

-Այո՛, գոհ եմ:

- 12 հազար 27քվե եք ստացել, նման արդյունք սպասո՞ւմ էիք:

-Իհա՛րկե, սպասում էի, տրամադրությունս էլ շատ լավ է:

-Ինչպե՞ս եք վերաբերվում քննադատություներին, որ աննախադեպ մեծ թվով ձայներ հավաքեց նախորդ խորհրդարանում երբևէ աչքի չընկած պատգամավորը:

-Մի երկու օրից գամ քաղաք, կպատասխանեմ Ձեր հարցերին: 

Արտակ Սարգսյանը չցանկացավ շարունակել հարցազրույցը՝  անպատասխան թողնելով հարցերն այն մասին՝ թե ինչո՞ւ են քաղաքացիներն իրեն ընտրել, որքա՞ն գումար է նա հատկացրել քարոզարշավի համար, և ճի՞շտ են արդյոք լուրերը, որ 6-րդ գումարման Ազգային ժողովում հայտնվելն իր համար արժեցել է հինգ միլիոն դրամ:

Հուսանք, որ երկու օր անց՝ այս և մեր այլ հարցերին պատգամավորը կտա սպառիչ պատասխաններ:

Հիշեցնենք, որ  ՀՀԿ-ական պատգամավորներից՝ Արտակ Սարգսյանն, ով  հայտնի է որպես ՍԱՍ-ի Արտակ, ՀՀ ԱԺ պատգամավոր է դարձել 2004թ. մեծամասնական ընտրակարգով՝ խորհրդարանում ընդգրկվելով ՕԵԿ խմբակցության կազմում: 2006թ., երբ Արթուր Բաղդասարյանը լքեց կոալիցիան եւ դարձավ ընդդիմադիր, Արտակ Սարգսյանն էլ հեռացավ ՕԵԿ-ից' անդամակցելով ՀՀԿ-ին: 

Աղավնի Սուքիասյան