Լրագրողների գործունեությանը խոչընդոտելու փաստերով հարուցված քրեական գործերն ընդունվել են ՀՔԾ վարույթ

2017թ.-ի ապրիլի 2-ին ՀՀ ԱԺ ընտրությունները լուսաբանող լրագրողների մասնագիտական գործունեությանը խոչընդոտելու դեպքերի առթիվ հարուցված երկու քրեական գործերն ընդունվել են Հատուկ քննչական ծառայության քննիչների վարույթ:

Քրեական գործերից մեկը հարուցվել է «Araratnews.am» լրատվական կայքի լրագրողի մասնագիտական գործունեությանը խոչընդոտելու փաստով: Այսպես, 02.04.17թ.-ին' Երևանում, ընտրությունները լուսաբանող զանգվածային լրատվության միջոցի' «Araratnews.am» լրատվական կայքի թղթակից Շողիկ Գալստյանը փորձել է նկարահանումներ կատարել Ռուսթավելի 15 հասցեում տեղակայված նախընտրական շտաբում, սակայն դրա մոտակայքում հավաքված մի խումբ բնակիչներ խոչընդոտել են նկարահանող խմբի աշխատանքն ու թույլ չեն տվել նկարահանումներ իրականացնել, վիրավորել և բռնության գործադրմամբ ստիպել են հեռանալ շտաբի մուտքի մոտից' լրագրողի ձեռքից խլելով նկարահանող սարքը:

Վարույթ ընդունված մյուս քրեական գործի նյութերի համաձայն' քվեարկության օրը խոչընդոտել են նաև ԱԺ ընտրությունները լուսաբանող մեկ այլ լրատվամիջոցի' «Ազատություն» ռադիոկայանի թղթակից Սիսակ Գաբրիելյանի աշխատանքը: Վերջինս փորձել է նկարահանումներ կատարել նույն Ռուսթավելի 15 հասցեում գտնվող նախընտրական շտաբում, սակայն մի խումբ անձինք խոչընդոտել են նրա աշխատանքը. հարձակվել են լրագրողի վրա, որի հետևանքով վերջինս թեթև վնասվածք է ստացել:

Այսպիսով, «Araratnews.am» լրատվական կայքի և «Ազատություն» ռադիոկայանի լրագրողների մասնագիտական գործունեությանը խոչընդոտելու դեպքերի առթիվ ՀՀ քրեական օրենսգրքի 149-րդ հոդվածի 2-րդ մասի 3-րդ և 5-րդ կետերով հարուցված քրեական գործերի նախաքննությունը շարունակվում է ՀՀ հատուկ քննչական ծառայությունում:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով' դատարանի' օրինական ուժի մեջ մտած դատավճռով: